قازاقستان تۇركياعا ءورت سوندىرەتىن 2 ارنايى تىكۇشاق پەن 16 قۇتقارۋشى جىبەردى، دەپ حابارلايدى Almaty-akshamy.kz ق ر تجم رەسمي وكىلى تالعات ۋاليگە سىلتەمە جاساپ.
«قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا ق ر توتەنشە جاعدايلار مينيسترلىگى سۋاعار قۇرىلعىلارى بار «قازاۆياقۇتقارۋ» اق-نىڭ مي-8 امت ەكى تىكۇشاعىن جانە قۇرامىندا 16 قۇتقارۋشى بار جەدەل توبىن ورمان ورتتەرىن سوندىرۋگە كومەك كورسەتۋ ءۇشىن تۇركيا رەسپۋبليكاسىنا جىبەردى»، - دەدى تالعات ءۋالي.
بۇگىن ۇشىپ شىققان قازاقستان تىكۇشاقتارى ءۇش مەملەكەتتە ايالداپ، ولاردىڭ شەكاراسى ارقىلى تۇركيانىڭ مۇعلا قالاسىنا جەتەدى. جەدەل توپتى نۇر-سۇلتان قالاسىنىڭ اۋەجايىندا ق ر تجم ءبىرىنشى ۆيسە-مينيسترى يبراگيم كۇلشىمبايەۆ شىعارىپ سالدى.
«قۇتقارۋشىلارىمىزدىڭ جەرگىلىكتى تۇرىك بيلىگىمەن ءوزارا ءىس-قيمىلىن قازاقستاننىڭ تۇركياداعى ەلشىلىگى ۇيلەستىرەدى. قازاقستان ورتەنگەن اۋماقتارداعى ورمان جامىلعىسىن قالپىنا كەلتىرۋگە گۋمانيتارلىق كومەك كورسەتۋگە نيەتتى. وتىرعىزىلعان ورمان قازاق جانە تۇرىك حالىقتارىنىڭ اراسىنداعى دوستىق پەن باۋىرلاستىق بايلانىستاردىڭ سيمۆولى بولادى»، – دەدى تجم رەسمي وكىلى.
انادولى اگەنتتىگى تۇركيادا 28 شىلدە مەن 6 تامىز ارالىعىندا بولعان 208 ورمان ءورتىنىڭ 196-سى اۋىزدىقتالعانىن حابارلاعان ەدى.