قازاقستان رەسپۋبليكاسىنىڭ ازاماتتىق قورعاۋ مەملەكەتتىك جۇيەسىنىڭ ءبىرىڭعاي ۆەدومستۆوارالىق راديو جەلىسىندە جۇمىس باستالدى، - دەپ حابارلايدى Aqshamnews.kz.
سوڭعى ۋاقىتقا دەيىن قازاقستان رەسپۋبليكاسىندا اۋماقتىڭ ەداۋىر ۇزاقتىلىعىنا بايلانىستى ءاربىر وڭىردە ۋقت-راديوبايلانىس جۇيەسى دەربەس قالىپتاستى. تەحنيكالىق شەشىمدەردىڭ بىتىراڭقىلىعى، ءبىرىڭعاي ستاندارتتىڭ بولماۋى جانە ءوڭىرارالىق ءوزارا ءىس-قيمىلدىڭ شەكتەۋلى مۇمكىندىكتەرى، اسىرەسە توتەنشە جاعدايلاردا بولىمشەلەردى باسقارۋ تيىمدىلىگىن ايتارلىقتاي تومەندەتتى.
بايلانىستىڭ ورنىقتىلىعىنا، سەنىمدىلىگىنە جانە جەدەلدىگىنە قويىلاتىن ءوسىپ كەلە جاتقان تالاپتار رەسپۋبليكالىق دەڭگەيدەگى ءبىرىڭعاي ورتالىقتاندىرىلعان ۋقت-راديوبايلانىس جۇيەسىن قۇرۋعا نەگىز بولدى.
وسى مىندەتتى ىسكە اسىرۋ ءۇشىن توتەنشە جاعدايلار مينيسترلىگى، ۇلتتىق ۇلان جانە قازاقستان رەسپۋبليكاسى ىشكى ىستەر مينيسترلىگى وكىلدەرىنىڭ قاتىسۋىمەن ۆەدومستۆوارالىق جۇمىس توبى قۇرىلدى.
جۇمىس توبىنىڭ قىزمەتى شەڭبەرىندە ۆەدومستۆوارالىق راديوجەلىنى قۇرۋ قاعيداتتارىن، راديوقامتۋدىڭ باسىم ايماقتارىن ايقىنداۋدى، ينفراقۇرىلىم وبەكتىلەرىن ورنالاستىرۋدى، سونداي-اق باسقارۋ تيىمدىلىگىن جانە كۇشتەر مەن قۇرالداردىڭ ءوزارا ءىس-قيمىلىن ارتتىرۋ ماقساتىندا جوبانى ىسكە اسىرۋدىڭ كەزەڭدىلىگىن قوسا العاندا، ونى ۇيىمداستىرۋ ماسەلەلەرى ەگجەي-تەگجەيلى قاراستىرىلدى جانە پىسىقتالدى.
قابىلدانعان شەشىمدەردىڭ قورىتىندىسى بويىنشا نەگىزگى ەلدى مەكەندەر مەن نەگىزگى كولىك باعىتتارىن قوسا العاندا، قازاقستان رەسپۋبليكاسى اۋماعىنىڭ نەگىزگى بولىگىندە راديوقامتۋدى باسىم قامتاماسىز ەتە وتىرىپ، جەلىنى كەزەڭ كەزەڭمەن ورىستەتۋ كوزدەلگەن. جىل بويى بازالىق ستانسيالاردى ورناتۋ بويىنشا مونتاجداۋ جۇمىستارى جۇرگىزىلدى.
قويىلعان مىندەتتى ىسكە اسىرۋ ەلىمىزدىڭ بارلىق وڭىرلەرىن ءبىرىڭعاي راديو جەلىسىنە بىرىكتىرۋگە مۇمكىندىك بەردى جانە ونى ودان ءارى كەڭەيتۋ ءۇشىن، ونىڭ ىشىندە شالعايداعى اۋدان ورتالىقتارى مەن جەتۋگە جولى قيىن اۋماقتاردى قامتۋ ەسەبىنەن جاعداي جاسادى.
جۇيەنى ودان ءارى دامىتۋ شەڭبەرىندە 2026 جىلى وبلىس ورتالىقتارىندا، رەسپۋبليكالىق ماڭىزى بار قالالاردا جانە استانادا تۇراقتى راديوسيگنالدى قامتاماسىز ەتۋ ءۇشىن قوسىمشا بازالىق ستانسيالاردى ساتىپ الۋ كوزدەلگەن.
SmartOne ديسپەچەرلىك پلاتفورماسىن قولدانا وتىرىپ، اۋداندىق بولىمشەلەردىڭ سيفرلىق رەترانسلياتورلارىن ءىرى اۋىلدىق ەلدى مەكەندەردە، شالعايداعى وبەكتىلەردە، اۆتوجولداردا جانە ورمان القاپتارىندا راديوبايلانىستى قامتاماسىز ەتۋ ءۇشىن كەيىننەن ونى ۇلعايتا وتىرىپ، ترانكينگتىك جەلىگە بىرىكتىرۋ جوسپارلانۋدا.
دامۋدىڭ كەلەسى ماڭىزدى كەزەڭى ترانكينگتىك جەلىلەر، 3G/4G/LTE كەڭ جولاقتى قولجەتىمدىلىك جەلىلەرى جانە ينتەرنەت جەلىلەرى كوررەسپوندەنتتەرىنىڭ جۇمىسىن ءبىرىڭعاي كوممۋنيكاسيالىق كەڭىستىكتە بىرىكتىرۋگە مۇمكىندىك بەرەتىن HyTalk كوممۋتاسيالىق جابدىعىن پايدالانا وتىرىپ بايلانىستى ۇيىمداستىرۋ بولادى.
ايتا كەتۋ كەرەك، قازاقستان رەسپۋبليكاسى تمد كەڭىستىگىندە بۇنداي اۋقىمداعى جانە اۋماقتىق قامتۋداعى راديو جەلىسىن ىسكە اسىرعان العاشقى ەل بولىپ تابىلادى.