"سامۇرىق-قازىنا" قورى باسقارماسىنىڭ ءتوراعاسى نۇرلان جاقىپوۆ تەمىرجولشىلار ۇجىمىنا ۇلتتىق كومپانيانىڭ جاڭا جەتەكشىسىن تانىستىردى. "قازاقستان تەمىر جولى" ۇلتتىق كومپانياسى باسقارما ءتوراعاسى بولىپ تالعات الدىبەرگەنوۆ تاعايىندالدى، - دەپ حابارلايدى aqshamnews.kz.
بۇعان دەيىن ول وسى كومپانيادا ءتوراعا ورىنباسارى قىزمەتىن اتقارعان.
جاڭا باسشى تۋرالى نە بەلگىلى؟
تالعات الدىبەرگەنوۆ – تەمىرجول سالاسىندا 35 جىلدان استام ەڭبەك ءوتىلى بار تاجىريبەلى مامان. الماتى تەمىرجول ينجەنەرلەرى ينستيتۋتىن ۇزدىك بىتىرگەن. سونىمەن قاتار، رەسەي پرەزيدەنتى جانىنداعى حالىق شارۋاشىلىعى جانە مەملەكەتتىك قىزمەت اكادەمياسىندا ەكونوميكا ماگيسترى جانە ەكونوميكا عىلىمدارىنىڭ كانديداتى عىلىمي دارەجەسىن العان.
ول ەڭبەك جولىن قاراپايىم جۇمىسشى رەتىندە باستاپ، ءتۇرلى باسشىلىق قىزمەتتەردى اتقارعان. 1990-جىلداردان باستاپ باتىس قازاقستان تەمىر جولىندا ءتۇرلى قىزمەتتەردە بولعان. كەيىن "قتج" قۇرامىنداعى اقتوبە فيليالىن باسقاردى، سونداي-اق كولىك لوگيستيكاسى مەن تاسىمالداۋ سالاسىنا قاتىستى ءبىرقاتار ۇيىمداردى باسقارعان.
2008–2019 جىلدارى بىرنەشە ءىرى كومپانيالاردىڭ، ونىڭ ىشىندە "كەدەنترانسسەرۆيس" پەن "Kazakhmys Maker" سەرىكتەستىكتەرىنىڭ باسشىسى بولدى. ال 2024 جىلدان بەرى "قازاقستان تەمىر جولى" ۇلتتىق كومپانياسى باسقارما ءتوراعاسىنىڭ ورىنباسارى لاۋازىمىن اتقارىپ كەلگەن.