قازاقستان 135 تاۋار ءتۇرىن قىتايعا ەكسپورتتاۋعا دايىن.
بۇل تۋرالى قازاقستان ساۋدا ۆيسە-مينيسترى قايرات تورەبايەۆ ايتتى، دەپ حابارلايدى Almaty-akshamy.kz
قحر كوممەرسيا ءمينيسترىنىڭ ورىنباسارى لين سزي قىتايدا قازاقستاندىق ءونىمدى تانىمال ەتۋ ماقساتىندا نانكين جانە چەندۋ قالالارىندا وكىلدىكتەر اشۋدى ۇسىندى.
ال قازاقستان ساۋدا ۆيسە-مينيسترى قايرات تورەبايەۆ ەكى ەل باسشىلارىنىڭ ەكىجاقتى تاۋار اينالىمىن 40 ملرد دوللارعا جەتكىزۋ جونىندەگى مىندەتتەرىنە مەرزىمنەن بۇرىن قول جەتكىزىلگەنىن اتاپ ءوتتى.
"ءبىز جۇڭگو نارىعىنا جەتكىزىلەتىن قازاقستاندىق ونىمدەر نومەنكلاتۋراسىن ودان ءارى ءارتاراپتاندىرۋعا نيەتتىمىز. قازاقستان 135 تاۋار پوزيسياسى بويىنشا قىتايعا $1 ملرد سوماعا قايتا وڭدەلگەن ءونىم ەكسپورتىن قوسىمشا ارتتىرۋعا دايىن"، - دەپ حابارلادى قايرات تورەبايەۆ.
ونىڭ ايتۋىنشا، قىتايعا جوعارى ساپالى جانە ەكولوگيالىق تازا اۋىل شارۋاشىلىعى ونىمدەرىن، ونىڭ ىشىندە سالقىنداتىلعان ەت ونىمدەرىن، بالىق ونىمدەرىن، قۇس ەتىن جانە سۋبونىمدەردى، شوشقا ەتىن، جۇمىرتقا، جىلقى ەتىن جانە باسقا دا جوعارى مارجينالدى تاۋارلاردىڭ كوپتەگەن ءتۇرىن جەتكىزۋگە بولادى.
قازاقستاندىق تاۋار وندىرۋشىلەر شانحاي EXPO، "قىتاي-ەۋرازيا ەكسپو" جانە باسقا دا كوپتەگەن كورمەگە بەلسەندى قاتىسۋدا.
وسى جىلدىڭ مامىر ايىندا Urumchi قالاسىندا QazTrade ساۋدا وكىلدىگى تىركەلدى. سونداي-اق چەندۋ قالاسىندا قىتايلىق كومپانيامەن بىرلەسىپ QazTrade سەرىكتەستىك كەڭسەسى اشىلدى. سونداي-اق نانكين قالاسىندا قازاقستاندىق ءونىمنىڭ ساۋدا پاۆيلونىن ىسكە قوسۋ جوسپارلانىپ وتىر.
تاراپتار ەكىجاقتى تاۋار اينالىمىنىڭ قۇرىلىمىن ودان ءارى ۇلعايتۋ جانە كەڭەيتۋ ءۇشىن بىرلەسكەن شارالار قابىلداۋ، سونداي-اق ەلەكتروندى كوممەرسيا، اۋىل شارۋاشىلىعى، شەكارا ماڭى ىنتىماقتاستىعى جانە ت.ب. سالالارداعى ساۋدانىڭ ءوسۋى ءۇشىن جاڭا مۇمكىندىكتەردى ىزدەستىرۋ تۋرالى كەلىستى.