18-20 جاستار اراسىنداعى ەۋروپا چەمپيوناتىنىڭ جالپىكوماندالىق ەسەبىندە قازاقستان قۇراماسى ەكىنشى ورىندى يەلەندى.
قازاقستان قازاندا وتكەن جاسوسپىرىمدەر اراسىنداعى مما بويىنشا ەۋروپا چەمپيوناتىندا ءۇش التىن مەدال جەڭىپ الدى، دەپ حابارلايدى Almaty-akshamy.kz.
«چەمپيوناتقا 14 ەلدەن 252 سپورتشى قاتىستى. قازاقستان اتىنان ۇلتتىق قۇرامانىڭ 27 مۇشەسىنەن قۇرالعان كوماندا قاتىستى. ءتورت جارىس كۇنىنىڭ قورىتىندىسى بويىنشا قازاقستان قۇراماسىنىڭ قورجىنىندا ءۇش التىن، جەتى كۇمىس جانە سەگىز قولا مەدال بار»، – دەپ حابارلادى قازاقستاننىڭ بىرىككەن مما فەدەراسيالارىنىڭ باسپا ءسوز قىزمەتى.
52 كەلىگە دەيىنگى سالماق دارەجەسىندە فينالدا ەرسۇلتان شاكەنباي رەسەيلىك يۆان ۆەرەتەننيكوۆتى ايقىن باسىمدىقپەن جەڭدى.
ال 77 كەلىگە دەيىنگى سالماقتا قازاقستاننىڭ ەكى وكىلى دانيل گۋبين مەن دوسجان كەنبايەۆ فينالدا كەزدەستى. تورەشىلەردىڭ شەشىمى بويىنشا التىن مەدال دانيل گۋبينگە بۇيىردى.
ءۇشىنشى التىندى ەرەسەكتەر اراسىندا 61،2 كەلىگە دەيىنگى سالماق دارەجەسىندە اقتوبەلىك جانىبەك تىنىشتىق جەڭىپ الدى. ول فينالدا رەسەيلىك فايتەر سەرگەي شيركۋنوۆپەن كەزدەستى. جانىبەك تىنىشتىق تورەشىلەردىڭ ءبىراۋىزدى شەشىمىمەن جەڭىسكە جەتتى.