ۇشىرۋ ءساتى روسكوسموستىڭ تەلەستۋدياسىنان تىكەلەي ەفير ارقىلى كورسەتىلدى.
بۇگىن نۇر-سۇلتان ۋاقىتىمەن تاڭعى ساعات 04:13-تە بايقوڭىر عارىش ايلاعى 31ء-شى الاڭىنىڭ «ۆوستوك» ۇشىرۋ كەشەنىنەن "فرەگات" ۇدەمەلى بلوگى جانە OneWeb بريتاندىق 34 عارىش اپپاراتى بار «سويۋز-2.1ب» زىمىران-تاسىعىشى ۇشىرىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
بۇعان دەيىن زىمىران-تاسىعىشتى ۇشىرۋ تەحنيكالىق سەبەپتەرگە بايلانىستى ەكى رەت كەيىنگە شەگەرىلگەن بولاتىن. ال بۇگىنگى ۇشىرۋ ءساتى روسكوسموستىڭ تەلەستۋدياسىنان تىكەلەي ەفير ارقىلى كورسەتىلدى. تىكەلەي رەپورتاجدى جۇرگىزۋشىلەردىڭ اقپاراتىنا سايكەس، زىمىران شتاتتىق رەجيمدە ۇشىرىلدى. «سويۋز 2.1 ب» زىمىران-تاسىعىش ساتىسىنىڭ ءبولىنۋى ۇشۋ سيكلگرامماسىنا سايكەس بولدى. زىمىران ۇشىرىلعاننان كەيىن 10 مينۋتتان سوڭ سپۋتنيكتەر توپتاماسى بار باستى بلوك وربيتاعا شىقتى. OneWeb تومەنوربيتالدى عارىش اپپاراتتارى جەر بەتىندەگى تۇتىنۋشىلاردى تىكەلەي سپۋتنيك بايلانىسى ارقىلى جىلدامدىعى جوعارى ينتەرنەتپەن قامتاماسىز ەتۋگە ارنالعان. بۇگىنگە دەيىن وربيتاعا 254 عارىش اپپاراتى شىعارىلعان بولاتىن. ەندى تاعى 34 سپۋتنيكتىڭ شىعارىلۋىمەن ولاردىڭ سانى 288-گە جەتەدى. كومپانيا جالپى سانى 500-دەن استام سپۋتنيكتى جەر اينالاسىنداعى وربيتاعا شىعارىپ، ولاردى كوممەرسيالىق ماقساتتا پايدالانۋدى كوزدەپ وتىر.