جاڭا شارالار مەن كۆوتالاردى اۋىل شارۋاشىلىعى مينيسترلىگى ەنگىزىپ وتىر، دەپ حابارلايدى aqshamnews.kz
قازاقستاننىڭ اۋىل شارۋاشىلىعى مينيسترلىگى ءىرى قارا ەتىن ەكسپورتتاۋعا ساندىق شەكتەۋلەر (كۆوتالار) ەنگىزەتىن بۇيرىقتى جاريالادى.
قۇجات جاڭا، سالقىنداتىلعان جانە مۇزداتىلعان ەتكە قاتىستى. شەكتەۋ ەاەو ەلدەرىنە جانە ءۇشىنشى مەملەكەتتەرگە ەكسپورتقا 13 مىڭ توننا كولەمىندە ەنگىزىلەدى.
مينيسترلىك كۆوتالاردى ءبولۋ ەرەجەسىن بەكىتتى. كۆوتا جەكە جانە/نەمەسە زاڭدى تۇلعالارعا، سونىڭ ىشىندە ەكسپورتتىق كومپانيالارعا بولىنەدى. ولاردىڭ وزدەرىنىڭ ەت وڭدەيتىن زاۋىتى بولۋعا ءتيىس.
سونىمەن قاتار قۋاتتىلىعى كەمىندە 5 مىڭ باس ءىرى قارا مالدى ازىقتاندىرۋعا جەتەتىن جەكە مال جەمدەيتىن الاڭى بولۋى كەرەك.
"ءىرى قارا مالدىڭ جاسى كەمىندە 12 ايعا تولعان، اۋىل شارۋاشىلىعى جانۋارلارىن يدەنتيفيكاسيالاۋ بازاسىندا تىركەلگەن، جەمدەۋ ۇزاقتىعى كەمىندە 4 اي بولۋى قاجەت. سونداي-اق اتالمىش مالدىڭ قۇلاعىندا RFID راديوجيىلىكتى بەلگى بولۋعا ءتيىس. كۆوتا كولەمى بولىنگەن كەزدە ءبىر باس مالعا ورتاشا سالماق رەتىندە 200 كگ ەسەپكە الىنادى"، - دەپ جازىلعان بۇيرىقتا.
سونداي-اق سىرتقى ساۋدا كەلىسىمدەرى تالاپ ەتىلەدى. بۇيرىق 2025 جىلعى 2 جەلتوقساننان 31 جەلتوقسانعا دەيىن ەنگىزىلەدى.