الەمنىڭ 40-قا جۋىق ەلىنىڭ 60 ءجۋرناليسىنىڭ جۇمىسىن قاراستىردى.
قازاقستان استاناسىندا «قازاقستان شەتەلدىك ب ا ق كوزىمەن» اتتى حالىقارالىق بايقاۋ جەڭىمپازدارىن ماراپاتتالدى، دەپ حابارلايدى Almaty-akshamy.kz.
Cىرتقى ىستەر مينيسترلىگى جانە قازاقستان باس رەداكتورلار كلۋبىنىڭ ۇيىمداستىرعان بايقاۋ وسىمەن التىنشى رەت وتكىزىلىپ وتىر جانە بيىلعى كونكۋرس قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالدى.
«بايقاۋ اياسىندا قازىلار القاسى الەمنىڭ 40-قا جۋىق ەلىنىڭ 60 ءجۋرناليسىنىڭ جۇمىسىن قاراستىردى. ماتەريالدار قازاقستانعا قاتىستى ەكونوميكا، ساياسات، حالىقارالىق قاتىناستار، تاريح، مادەنيەت، تۋريزم، دەنساۋلىق ساقتاۋ، سپورت، يادرولىق قارۋسىزدانۋ، جاڭارتىلمالى ەنەرگيا كوزدەرى سياقتى كەڭ اۋقىمدى تاقىرىپتارعا، سونداي-اق قازاق حالقىنىڭ كورنەكتى تۇلعالارى – اباي قۇنانباي ۇلى مەن ءابۋ ناسىر ءال-فارابيدىڭ مۇراسىنا ارنالدى»،– دەلىنگەن ءسىم باسپا ءسوز قىزمەتىنىڭ حابارلاماسىندا.
بايقاۋعا قاتىسۋشىلاردىڭ ماتەريالدارى شەتەلدىك گازەتتەردە، جۋرنالداردا، ينتەرنەت-باسىلىمداردا جانە تانىمال ينتەرنەت پلاتفورمالارىندا جاريالاندى.
قازىلار القاسىنىڭ شەشىمىمەن 6 شەتەلدىك جۋرناليست جەڭىمپاز بولىپ تانىلدى. ولار – «رەسپۋبليكا»، «ليتۆالىق كۋرەر» اپتالىق باسىلىمداردىڭ جانە «ەحو ليتۆا» گازەتىنىڭ باس رەداكتورى ن.جۋكوۆ (ليتۆا)، «Finančné Noviny» باسىلىمىنىڭ باس رەداكتورى ۆ.باچيشين (سلوۆاكيا)، پاكىستاننىڭ جاھاندىق جانە ستراتەگيالىق زەرتتەۋلەر ورتالىعىنىڭ ايماقتىق ساراپشىسى دوكتور م.ۋل-حاسان حان (پاكىستان)، كانادانىڭ ەميگراسيا جانە مۋلتيكۋلتۋراليزم ماسەلەلەرى جونىندەگى بۇرىنعى ءمينيسترى ت.رۋپرەحت (كانادا)، «BCI مەديا» كومپانياسىنىڭ كوممەرسيالىق پروديۋسەرى ي.چەرنەي-كەلنەر (كانادا)، جانە «MNB» تەلەارناسىنىڭ ءتىلشىسى س.بات-ەردەنە (مونعوليا).
ماراپاتتاۋ راسىمىنە قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرلان الىمبايەۆ، قازاقستان باس رەداكتورلارى كلۋبىنىڭ پرەزيدەنتى بيبىگۇل جەكسەنباي، نۇر-سۇلتان قالاسىندا اككرەديتتەلگەن شەتەلدىك ديپلوماتيالىق كورپۋستىڭ جانە جەتەكشى قازاقستاندىق ب ا ق وكىلدەرى قاتىستى.
