اكىمدىكتەردىڭ دەرەگى بويىنشا 2024 جىلى قازاقستاندىق شارۋالار 158 مىڭ گەكتار جەرگە سۋ ۇنەمدەۋ تەحنولوگيالارىن ەنگىزدى.
اتاپ ايتقاندا، 56 مىڭ گەكتار ەگىس القابىنا تابيعي جاۋىن–شاشىندى يميتاسيالايتىن جاڭبىرلاتىپ سۋارۋ جۇيەلەرى، 44 مىڭ گەكتارعا سۋدى وسىمدىكتەردىڭ تامىرىنا تىكەلەي جەتكىزەتىن تامشىلاتىپ سۋارۋ جۇيەلەرى ەنگىزىلدى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
«بىزگە بەرىلگەن تاپسىرمالاردىڭ قالاي ورىندالىپ جاتقانى جانە وسى باعىتتاعى جوسپارىمىز تۋرالى حالىققا ەسەپ بەرۋ قاجەت دەپ سانايمىن. اقپاراتتى كەزەڭ-كەزەڭىمەن جاريالايمىن»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
مينيستر 58 مىڭ گەكتارعا جۋىق جەر لازەرلىك جوسپارلاۋشى ارقىلى تەگىستەلگەنىن مالىمدەدى. ەگىس القاپتارىن تەگىستەۋ سۋارۋ تيىمدىلىگىن ارتتىرا وتىرىپ، سۋارمالى سۋدى بىركەلكى تاراتۋعا مۇمكىندىك بەرەدى.
2024 جىلى سۋ رەسۋرستارى جانە يرريگاسيا مينيسترلىگى اۋىل شارۋاشىلىعى مينيسترلىگىمەن بىرگە شارۋالاردى قاجەت ينفراقۇرىلىمدى قالىپتاستىرۋ، سۋ ۇنەمدەۋ جۇيەلەرىن ساتىپ الۋ جانە ورناتۋ شىعىندارىن سۋبسيديالاۋ مولشەرىن 50%-دان 80%-عا دەيىن ارتتىردى.
سونىمەن قاتار، بۇگىنگى تاڭدا سۋ ۇنەمدەۋ تەحنولوگياسىن قولداناتىن ديحاندار سۋارمالى سۋ ءۇشىن از تولەيدى. سەبەبى، سۋ ۇنەمدەۋ جۇيەلەرىن پايدالانۋ كەزىندە سۋارمالى سۋ اقىسىن سۋبسيديالاۋ مولشەرى تاريفكە بايلانىستى 85%-عا دەيىن ۇلعايتىلدى.
ال وبلىستىق اكىمدىكتەرگە سۋ ۇنەمدەۋ تەحنولوگيالارىن ەنگىزۋ ينديكاتورلارى بەلگىلەندى. اكىمدىكتەر ءوز كەزەگىندە ەگىس القاپتارىندا سۋ ۇنەمدەۋ جۇيەلەرىن ەنگىزۋدىڭ 2030 جىلعا دەيىنگى جوسپارىن ازىرلەپ، بەكىتتى.
جالپى، قازاق سۋ شارۋاشىلىعى عىلىمي-زەرتتەۋ ينستيتۋتىنىڭ ەسەبى بويىنشا سۋ ۇنەمدەۋ تەحنولوگيالارىن پايدالانۋ 30%-عا دەيىن سۋ ۇنەمدەۋگە مۇمكىندىك بەرەدى.
بۇگىنگى تاڭدا قازاقستاندا سۋ شاشاتىن ماشينالار مەن تامشىلاتىپ سۋارۋ جابدىعىن شىعاراتىن ءتورت وتاندىق زاۋىت جۇمىس ىستەيدى. بۇل رەتتە شەتەلدىك كاسىپورىنداردى تارتۋ بويىنشا دا بەلسەندى جۇمىس جۇرگىزىلۋدە. مىسالى، Kazakh Invest ۇلتتىق كومپانياسىمەن بىرگە ەلىمىزدە ەكى تۇرىك جانە ءبىر جۇڭگو كومپانيالارىنىڭ جاڭبىرلاتىپ سۋارۋ ماشينالارىن شىعارۋدى ىسكە قوسۋ بويىنشا ءۇش جوبا ىسكە اسىرىلىپ جاتىر.
سونىمەن قاتار، بيىل تۇركىستان وبلىسىندا قىتايلىق كومپانيالارمەن بىرلەسىپ تامشىلاتىپ سۋارۋ جابدىعىن شىعاراتىن ەكى زاۋىت اشۋ جوسپارلانىپ وتىر.
سونداي-اق، ءبىزدىڭ مينيسترلىك سۋ ۇنەمدەيتىن يننوۆاسيالىق تەحنولوگيالاردى سىناقتان وتكىزۋدە. ماسەلەن، بىلتىر ەلىمىزدىڭ جەتەكشى عىلىمي-زەرتتەۋ ينستيتۋتتارىمەن بىرلەسىپ ماجارلىق Water-Retainer پرەپاراتى سىناقتان ءوتتى. سىناق ناتيجەسى جەكەلەگەن داقىلدار بويىنشا سۋ ۇنەمدەۋ جانە ونىمدىلىكتى ارتتىرۋ بويىنشا وڭ اسەرىن كورسەتتى. الدىن الا مالىمەت بويىنشا، پرەپاراتتى قولدانۋ شامامەن 20-37% سۋ ۇنەمدەۋگە مۇمكىندىك بەرەدى، سونىمەن قاتار ونىمدىلىكتى جاقسارتادى.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا سۋ ۇنەمدەۋ تەحنولوگيالارىن ەنگىزۋ قاجەتتىگىن تاعى دا اتاپ ءوتتى. پرەزيدەنت وسىعان دەيىن، 2023 جىلعى جولداۋىندا ەلىمىزدە جىل سايىن 150 مىڭ گەكتار جەرگە سۋ ۇنەمدەۋ تەحنولوگيالارىن ەنگىزۋ مىندەتىن قويعان بولاتىن. ءبىزدىڭ مينيسترلىك جۇزەگە اسىرىپ جاتقان ءىس-شارالار وسى ناتيجەگە قول جەتكىزۋگە باعىتتالىپ وتىر»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.