2025 جىل قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسى ءۇشىن قالىپتاسۋ جانە العاشقى پراكتيكالىق قادامدار كەزەڭى بولدى. وسى ۋاقىت ارالىعىندا اكادەميا ۇيىمدىق تۇرعىدان ورنىعۋدان ناقتى قىزمەتتى باستاۋعا دەيىنگى جولدان ءوتىپ، ستراتەگيالىق باسىمدىقتاردى ايقىندادى، العاشقى عىلىمي-يندۋستريالىق باستامالاردى ىسكە قوستى جانە وڭىرلەردىڭ ءوز دامۋ باعىتتارىن ايقىنداۋىنا قولداۋ كورسەتۋ جۇمىستارى باستالدى.
قازاقستان عىلىمىنىڭ جاڭا ارحيتەكتۋراسى. نەگىزگى ينستيتۋسيونالدىق وقيعا قازاقستان رەسپۋبليكاسى ۇلتتىق عىلىم اكادەمياسىنىڭ 2035 جىلعا دەيىنگى دامۋ ستراتەگياسىنىڭ بەكىتىلۋى جانە جاڭارتىلعان ۇيىمداستىرۋشىلىق مودەلدىڭ قالىپتاستىرىلۋى بولدى. وسى ۇدەرىس اياسىندا عىلىمنىڭ ءتورت بەيىندىك بولىمشەسى جۇمىس ىستەيدى: «ءومىر مەن دەنساۋلىق تۋرالى عىلىمدار»، «ءبىلىم جانە قوعامدىق دامۋ تۋرالى عىلىمدار»، «جەر، عارىش جانە كوممۋنيكاسيالار تۋرالى عىلىمدار»، «اگروبيورەسۋرستار جانە ەكولوگيا تۋرالى عىلىمدار». نەگىزگى باعىتتار بويىنشا 17 اكادەميك سايلانىپ، بۇعان دەيىن «ق ر ۇعا» قوعامدىق بىرلەستىگى قۇرامىندا بولعان 146 عالىمعا قۇرمەتتى اكادەميك مارتەبەسى بەرىلدى.
وسىلايشا، اكادەميا بىرتىندەپ مەملەكەت، ۋنيۆەرسيتەتتەر، عىلىمي-زەرتتەۋ ينستيتۋتتارى مەن بيزنەس مۇددەلەرى توعىساتىن ورتالىق الاڭ مارتەبەسىنە يە بولۋدا. بۇل جۇمىس لوگيكاسىنىڭ جاڭارۋىن ايقىنداپ، جەكەلەگەن تاقىرىپتاردان ءپانارالىق باعدارلامالارعا، ۆەدومستۆولىق تاسىلدەن ۇلتتىق باسىمدىقتارعا كوشۋگە نەگىز قالايدى.
ينتۋيسيانىڭ ورنىنا – فورسايت. 2025 جىلدىڭ ايرىقشا ەرەكشەلىگى فورسايت ءتاسىلىنىڭ جوسپارلاۋدىڭ تۇراقتى قۇرالى رەتىندە ەنگىزىلۋى بولدى. 2024 جىلدان بەرى اكىمدىكتەردىڭ، مينيسترلىكتەردىڭ، ۋنيۆەرسيتەتتەردىڭ، عىلىمي-زەرتتەۋ ينستيتۋتتارىنىڭ جانە ناقتى سەكتور كاسىپورىندارىنىڭ قاتىسۋىمەن 70 وڭىرلىك جانە سالالىق سەسسيا وتكىزىلدى. بۇل الاڭداردا ابستراكتىلى تاقىرىپتار ەمەس، ەكونوميكانىڭ جانە قوعامنىڭ ناقتى سۇرانىستارى تالقىلاندى: ورنىقتى ەگىنشىلىكتەن جانە سۋ قاۋىپسىزدىگىنەن باستاپ، مەديسينانى جانە لوگيستيكانى سيفرلاندىرۋعا دەيىن.
جۇرگىزىلگەن جۇمىستىڭ ناتيجەسىندە باعدارلامالىق-نىسانالى قارجىلاندىرۋعا ارنالعان 220 پەرسپەكتيۆالى مىندەت پەن 65 عىلىمي-تەحنيكالىق تاپسىرما قالىپتاستىرىلدى. سونىمەن قاتار جامبىل، اباي، اتىراۋ، ماڭعىستاۋ، قوستاناي جانە شىعىس قازاقستان وبلىستارىندا تەحنولوگيالىق ۇردىستەردى مونيتورينگتەۋ جانە عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا (عزتكج) وتىنىمدەر دايىنداۋ ماقساتىندا وڭىرلىك فورسايت-ورتالىقتار ءوز جۇمىسىن باستادى.
سيفرلىق ترانسفورماسيانىڭ ماڭىزدى قادامى قازاقستان رەسپۋبليكاسى ۇلتتىق عىلىم اكادەمياسىنىڭ تالداۋ جانە فورسايت پلاتفورماسىن ازىرلەۋ بولدى. پلاتفورمادا 2011 جىلدان بەرگى ۇلتتىق فورسايتتار دەرەكتەرى، اكادەميانىڭ 2024 جىلعى عىلىم فورسايتىنىڭ ناتيجەلەرى، يندۋستريانىڭ تەحنولوگيالىق سۇرانىستارى، سونداي-اق ەنگىزۋگە دايىن اياقتالعان عزتكج بازاسى جيناقتالعان. بۇل جۇيە ناقتى ۋاقىت رەجيمىندە مەملەكەتتىڭ قانداي باعىتتاردى قولدايتىنىن، قۇزىرەتتەردىڭ قاي جەردە شوعىرلانعانىن جانە سالىنعان قاراجاتتىڭ تيىمدىلىگىن كورۋگە مۇمكىندىك بەرەدى.
سيفرلىق ترانسفورماسيانىڭ جەكە باعىتى Korea Institute of Science and Technology Information ۇيىمىمەن بىرلەسكەن «AI SilkNet» ورتالىعىن قۇرۋ جوباسى ىسكە اسىرىلۋدا. ونىڭ ماقساتى — عىلىمي جاريالانىمدار مەن پاتەنتتەردەن باستاپ جوبالار مەن كادرلىق الەۋەتكە دەيىنگى عىلىمي-تەحنولوگيالىق جۇيەنىڭ سان-الۋان دەرەكتەرىن ءبىرىڭعاي زياتكەرلىك ەكوجۇيەگە بىرىكتىرۋ.
جۇيەنى تالداۋ: ماسەلەلەر تۋرالى اشىق اڭگىمە. فورسايتتىق بولجاۋ قۇرالى مەن ۇلكەن دەرەكتەردى پايدالانا وتىرىپ، اكادەميا ەڭ ماڭىزدىسىنان اشىق تالداۋ جاساۋدان باستادى. اتاپ ايتقاندا، 114 عىلىمي-تەحنيكالىق تاپسىرماعا جۇرگىزىلگەن ساراپتاما ولاردىڭ 88ء-ى بويىنشا ەلەۋلى ەسكەرتۋلەر بار ەكەنىن كورسەتتى. نەگىزگى ماسەلەلەر — تاقىرىپتاردىڭ جۇيەسىزدىگى، ۇلتتىق باسىمدىقتارمەن بايلانىسى تومەن بولۋى جانە رەسۋرستاردىڭ ءتيىمسىز ءبولىنۋى.
تاعى ءبىر الاڭداتارلىقعى «سىندارلى ماسسانىڭ» تاپشىلىعى: تاپسىرمالاردىڭ نەبارى 27%-ى عانا ەكى جانە ودان دا كوپ ءوتىنىم الدى. بۇل ءبىرقاتار باعىتتاردا باسەكەنىڭ تومەندىگىن جانە كادرلىق الەۋەتتىڭ شەكتەۋلىلىگىن اڭعارتادى. بۇعان وڭىرلىك تەڭگەرىمسىزدىك تە قوسىلادى: عالىمداردىڭ 60%-دان استامى جانە بيۋدجەتتىك قاراجاتتىڭ 70%-دان كوبى الماتى مەن استانا قالالارىندا شوعىرلانعان. سونىمەن قاتار زاماناۋي عىلىمي جابدىقتىڭ جەتىسپەۋى جانە جان باسىنا شاققانداعى زەرتتەۋشىلەر سانىنىڭ تومەندىگى جۇيەلىك ماسەلە رەتىندە ساقتالۋدا.
تالداۋ قورىتىندىسى بويىنشا اكادەميا عىلىم جانە جوعارى ءبىلىم مينيسترلىگىنە عىلىمي كادرلاردى دايارلاۋ جۇيەسىن رەفورمالاۋ جانە زەرتتەۋ ينفراقۇرىلىمىن دامىتۋ جونىندە ۇسىنىستار قامتىلعان اناليتيكالىق جازبالار جولدادى. وسىلايشا اكادەميا ءوزىنىڭ نەگىزگى فۋنكسياسىن — مەملەكەتكە عىلىمي-تەحنولوگيالىق ساياساتتى قالىپتاستىرۋ ءۇشىن ساراپتامالىق باعالار مەن ۇسىنىمدار بەرۋ مىندەتىن ىسكە اسىرۋعا كىرىستى.
بولىكتەرگە بولىنگەن جوبالاردان – فلاگماندىق باعدارلامالارعا. انىقتالعان پروبلەمالاردى شەشۋ ءۇشىن قازاقستاندا جاڭا فورما ەنگىزىلدى – ينتەگراسيالىق، سالالىق-ارالاس عىلىمي-تەحنيكالىق باعدارلامالار. بۇل ءىرى «كومبە جوبالار» فۋندامەنتالدى زەرتتەۋلەردى، عىلىمي كادرلاردى دايىنداۋدى، قولدانبالى ازىرلەمەلەردى جانە وندىرىستە ەنگىزۋدى ءبىرتۇتاس جۇيەگە بىرىكتىرەدى.
مينيسترلىككە ءتورت پيلوتتىق باعدارلامانىڭ جوبالارى ۇسىنىلدى. سونىمەن قاتار، ق ر ۇعا نازاربايەۆ ۋنيۆەرسيتەتىمەن بىرگە فلاگماندىق باعدارلامالاردى ىسكە قوسادى. بۇل باعدارلامالار كونسورسيۋمدىق پرينسيپ بويىنشا («ۋنيۆەرسيتەت – عىلىمي-زەرتتەۋ ينستيتۋتى – بيزنەس») ۇيىمداستىرىلعان. باعدارلامانىڭ باستى باعىتتارى:
· اگروبيوتەحنولوگيالار – گەنومدىق پرەسەلەكسيادان باستاپ سەلەكسيا، تۇقىم شارۋاشىلىعى جانە اۋىل شارۋاشىلىعى شيكىزاتىن تەرەڭ وڭدەۋگە دەيىن.
· جاڭا ەنەرگەتيكالىق تەحنولوگيالار – ەنەرگەتيكا، ەنەرگيا تيىمدىلىگى، ەنەرگيا جيناعىشتار، جاڭا ماتەريالدار جانە ەنەرگەتيكالىق جۇيەگە تەرەڭ ينتەگراسياعا ارنالعان سيفرلىق شەشىمدەر.
· بيومەديسينا – بيوماركەرلەردى ىزدەۋدەن باستاپ دوكلينيكالىق زەرتتەۋلەر، كلينيكالىق سىناقتار، GMPء-وندىرىس جانە نارىققا شىعۋ.
فلاگماندىق باعدارلامالاردىڭ ماقساتى – تەك عىلىمي جاريالانىمدار ەمەس، سونىمەن قاتار ناقتى ونىمدەر مەن سەرۆيستەر جاساۋ، تەحنولوگيالاردى ەكسپورتقا شىعارۋ. باعدارلامانىڭ باستى كورسەتكىشتەرى: تەحنولوگيالىق دايىندىق دەڭگەيى TRL-8 جانە ودان جوعارى، جەكە ينۆەستيسيالاردى تارتۋ (بيۋدجەتكە 1 تەڭگەگە كەمىندە 2،5 تەڭگە بيۋدجەتتىك ەمەس قارجى)، ەكسپورت پەن جاڭا جۇمىس ورىندارىنىڭ ءوسۋى.
«قۋاتتى وڭىرلىك عىلىم – قۋاتتى ءوڭىر». ق ر ۇلتتىق عىلىم اكادەمياسىنىڭ ماڭىزدى جوبالارىنىڭ ءبىرى – «قۋاتتى وڭىرلىك عىلىم – قۋاتتى ءوڭىر» باستاماسى. 2024 جىلدان باستاپ اكادەميا پرەزيديۋمى وبلىستار مەن ءىرى قالالاردا 10 كوپشەلى وتىرىس وتكىزدى. ءار وتىرىس جەرگىلىكتى ەكونوميكانى دامىتۋعا ارنالعان عىلىمي ازىرلەمەلەر كورمەسىمەن قاتار ءوتتى – جاڭا وسىمدىك سورتتارىنان باستاپ مەديسينالىق تەحنولوگيالارعا، قۇرىلىس جانە ترانسپورت شەشىمدەرىنە دەيىن.
وڭىرلىك وتىرىستىڭ كۇن ءتارتىبى نەگىزىنەن قولدانبالى سيپاتتا بولدى. اتاپ ايتقاندا، اگرارلىق وبلىستاردا تۇراقتى وسىمدىك شارۋاشىلىعى؛ سۋارمالى جەرلەردى ءتيىمدى پايدالانۋ جانە ءونىمدى قايتا وڭدەۋ ماسەلەلەرى قارالدى؛ مۇناي-گاز سالاسى دامىعان وڭىرلەردە ەكولوگيا جانە ۇزدىك قولجەتىمدى تەحنولوگيالاردى ەنگىزۋ تالقىلاندى؛ كاسپيي وڭىرىندە تەڭىز لوگيستيكاسى مەن شەكاراارالىق كولىك دالىزدەرى قارالدى؛ اباي وبلىسىندا اتوم ەنەرگەتيكاسىن دامىتۋ جانە كۋرچاتوۆ عىلىم قالاشىعى ماسەلەلەرى قارالدى. وڭىرلەر ءۇشىن فورسايت-سەسسيالار ۇيىمداستىرىلىپ، عىلىمي-تەحنيكالىق دامۋدىڭ پەرسپەكتيۆالىق سەنارييلەرى مەن باسىمدىقتارى انىقتالدى.
تالقىلاۋلاردىڭ پراكتيكالىق جالعاسى رەتىندە اكادەميا اكىمدىكتەرگە مەتوديكالىق قۇجاتتار پاكەتىن ازىرلەدى: وڭىرلىك عىلىم كەڭەستەرى تۋرالى تيپتىك ەرەجە، قولدانبالى عىلىمي-زەرتتەۋ جانە تاجىريبەلىك-كونسترۋكتورلىق جۇمىستار كونكۋرستارىن وتكىزۋگە ارنالعان ۇسىنىستار، عىلىمي ۇيىمدارمەن ءوزارا ءىس-قيمىلدىڭ ءبىرىزدى تاسىلدەرى. سونىمەن قاتار، وڭىرلىك عىلىمدى دامىتۋ بويىنشا بىرلەسكەن جوسپارلار بەكىتىلىپ، ولارعا اكىمدەر مەن ۇعا پرەزيدەنتى قول قويدى، اكادەميانىڭ وڭىرلىك فيليالدارى اشىلدى.
كوپشەلى وتىرىستار قورىتىندىسى بويىنشا پرەزيدەنتكە ارنالعان اناليتيكالىق جازبالار دايىندالدى. وندا ۇسىنىستار كەلەسى باعىتتاردى قامتيدى: اگرارلىق عىلىمدى دامىتۋ جانە ۇلتتىق اگرارلىق ءعىلىمي-بىلىم بەرۋ ورتالىعىن رەفورمالاۋ؛ ۇلتتىق گەنەتيكالىق بانك قۇرۋ، بيولوگيالىق ارتۇرلىلىكتى جانە گەنەتيكالىق رەسۋرستاردى ساقتاۋ؛ كومىرتەكتى ەگىنشىلىك جۇيەسىن ەنگىزۋ؛ يادرولىق ەنەرگەتيكانى دامىتۋ؛ ەۋروپا مەن ازيا اراسىنداعى كولىك-لوگيستيكالىق حاب قالىپتاستىرۋ؛ مەديسينا سالاسىندا سالالىق يننوۆاسيالىق ەكوجۇيە قۇرۋ.
2025 جىل ق ر ۇلتتىق عىلىم اكادەمياسىندا جاڭا حالىقارالىق ورتالىقتار مەن ينستيتۋتتاردى ىسكە قوسۋدىڭ باستاۋى بولدى.
· كەڭىستىك‑ۋاقىتتىق جاساندى ينتەللەكت جانە تۇراقتى دامۋ زەرتحاناسى – جۇڭگو عىلىم اكادەمياسى، جۇڭگو ينجەنەرلىك اكادەمياسى، چجەسزيان تەحنولوگيالىق ۋنيۆەرسيتەتى جانە قىتايدىڭ بىرنەشە تەحنولوگيالىق كومپانياسىمەن بىرلەسكەن جوبا. زەرتحانا اياسىندا قازاقستاندىق DeepBas ۇلكەن جاساندى ينتەللەكت مودەلى جاسالىپ، تابيعي رەسۋرستاردى، قالالاردى جانە ينفراقۇرىلىمدى باسقارۋعا ارنالعان كەڭىستىك‑ۋاقىتتىق اناليتيكا دامىتىلادى. جوبا ەكزافلوپس كلاستى سۋپەركومپيۋتەرلەردى، ينتەللەكتۋالدى دروندار مەن روبوتتالعان جۇيەلەردى قولدانۋدى كوزدەيدى.
· كومىرتەكتى پوليگون جانە «وڭتۇستىك» مەن «سولتۇستىك» سەلەكسيالىق-گەنەتيكالىق ورتالىقتارى – رەسەي عىلىم اكادەمياسىنىڭ عزي-مەن بىرلەسكەن جوبا. 3000-نان استام بيوڭۇقا الماسۋدان باسقا، سورتتاردى بەيىمدەۋ الاڭدارى جانە كومىرتەكسىز ەگىنشىلىك تاجىريبەسى قۇرىلادى.
· قازاقستان‑گەرمانيا NEXUS ينستيتۋتى (قازۇازۋ جانىندا) – كليمات وزگەرىسى مەن سۋ تاپشىلىعىنا جاۋاپ. ينستيتۋت «جەر – سۋ – ەنەرگيا – بيوارتۇرلىلىك» ايماعىندا جۇمىس ىستەپ، سۋ سەكتورىن سيفرلاندىرۋ جانە ورتالىق ازيادا ترانسشەكارالىق سۋ رەسۋرستارىن باسقارۋ مودەلدەرىن ازىرلەيدى.
· جاڭا ماتەريالدار جانە ەنەرگەتيكالىق تەحنولوگيالار ينستيتۋتى – اتومدىق، سۋتەكتى جانە سيفرلىق ەنەرگەتيكا سالاسىندا، سونداي‑اق ەنەرگيانى جيناقتاۋ جۇيەلەرىندە كومپەتەنسيا ورتالىعى. ماقساتى – قازاقستاندا اەس جوبالارىن قولداۋ، جاڭارتىلاتىن ەنەرگيا كوزدەرىن دامىتۋ جانە كومىرتەكسىزدىككە ءوتۋ.
· شىمكەنتتەگى پەرسپەكتيۆالى كارديولوگيالىق زەرتتەۋلەر ورتالىعى – «ەكوكارديولوگيانى» دامىتۋ الاڭى. مۇندا مەديسينالىق دەرەكتەر كليماتتىق، ەكولوگيالىق جانە الەۋمەتتىك فاكتورلارمەن بىرگە تالدانادى. جۇرەك-قان تامىرلارى اۋرۋلارىن ەرتە انىقتاۋ جۇيەسى مەن وڭىرلىك دەنساۋلىق مونيتورينگى مودەلى جاسالىپ جاتىر.
سونىمەن قاتار، عىلىمي يندۋستريالىق پلاتفورمالار دامۋدا (عىلىمدى بەينەلەۋ، كوممەرسيالاندىرۋدى جەدەلدەتۋ):
· ينتەنسيۆتى ەگىنشىلىك بويىنشا قۇزىرەتتىلىك ورتالىعى (KMG PetroChem كومپانياسىمەن بىرلەسىپ)؛
· «سارىارقا» اەز اۋماعىندا كۇن ەنەرگەتيكاسىنا ارنالعان كرەمنيي كلاستەرى؛
· «الماتى جاسىل قورى» – جاسىل ايماقتاردىڭ سيفرلىق ءتىزىلىمى مەن ورمان پاتولوگيالىق مونيتورينگى؛
· ءداندى ماتەريال ساپاسىن سيفرلىق باقىلاۋ جۇيەسى (پيلوتتىق جوبا – قوستاناي جانە الماتى وبلىستارىندا).
بۇل باستامالاردىڭ جالپى ءپرينسيپى – عىلىم تەك ءبىلىم الۋ ءۇشىن عانا ەمەس، سونىمەن قاتار قولدانبالى سيپاتقا يە بولۋى، ناقتى ناتيجەلەردى بەرۋى: تەحنولوگيالار، سەرۆيستەر، جاڭا جۇمىس ورىندارى جانە ەكسپورتتىق مۇمكىندىكتەر.
ادامدار مەن عىلىمنىڭ قۇندىلىقتارى. اكادەميانىڭ ەرەكشە باعىتى ادام كاپيتالى مەن عىلىمي مادەنيەت ماسەلەلەرى. ق ر ۇلتتىق عىلىم اكادەمياسى (ۇعا) مەملەكەتتىك عىلىمي سىيلىقتار مەن مەملەكەتتىك عىلىمي ستيپەنديالار كونكۋرستارىن ۇيلەستىرىپ، پروسەدۋرالاردىڭ اشىقتىعىن Astana Hub بازاسىندا ەلەكتروندىق پلاتفورما ارقىلى قامتاماسىز ەتەدى. ماڭىزدى فۋنكسيالاردىڭ ءبىرى – جوعارى عىلىمي-تەحنيكالىق كوميسسياعا ۇسىنىلاتىن عىلىمي-تەحنيكالىق تاپسىرمالاردى ساراپتاۋ.
قوعامدىق ومىردە ماڭىزدى قادام رەتىندە ۇعا جاس عالىمدار كەڭەسىنىڭ قۇرىلۋى بولدى. بۇل فورمالدى ورگان ەمەس، كەرىسىنشە، جاس زەرتتەۋشىلەردىڭ «عىلىم جانە تەحنولوگيالىق ساياسات تۋرالى» زاڭدى تالقىلاۋعا قاتىسۋىنا، ەڭبەكاقى مەن مارتەبە بويىنشا ۇسىنىستار ازىرلەۋىنە ارنالعان الاڭ. وسى ۇسىنىستاردىڭ ءبىر بولىگى نورماتيۆتىك قۇقىقتىق اكتىلەردە ەسكەرىلگەن.
مەكتەپ وقۋشىلارى مەن ستۋدەنتتەر ءۇشىن جاس زەرتتەۋشىلەر اكادەمياسى ىسكە قوسىلدى. مامىردا العاش جاس زەرتتەۋشىلەر فورۋمى ءوتتى، وعان 400-دەن استام قاتىسۋشى جينالدى. قاتىسۋشىلار جوبالارىن تانىستىرىپ، «زياتكەر» كونكۋرسىنا قاتىسىپ، شەبەرلىك سىنىپتارىنا جانە اكادەميكتەرمەن كەزدەسۋلەرگە قاتىستى. ءبىلىم مينيسترلىگىمەن بىرلەسىپ «جاس زەرتتەۋشىلەر» باعدارلاماسىنىڭ تۇجىرىمداماسى ازىرلەندى جانە قازاق تىلىندە «ءال ءجابردىڭ اتاسى» اتتى عىلىمي‑تانىمدىق جۋرنال شىعارا باستادى.
عىلىمي ەتيكا ستاندارتتارى دا ۇمىتىلمادى. اكادەميا عىلىمي ەتيكا كودەكسىن جانە يۋنەسكو جانىنداعى ۇلتتىق كوميتەتپەن بىرلەسىپ ازىرلەنگەن عىلىمي زەرتتەۋلەر بيوەتيكا كودەكسىن بەكىتتى. وسىلايشا، الەمدىك تاجىريبەلەرگە جانە ءوز تالداۋىمىزعا سۇيەنە وتىرىپ، ءبىز قازاقستان عىلىمىن جاھاندىق عىلىمي كەڭىستىككە ينتەگراسيالايتىن ستاندارتتار جۇيەسىن قالىپتاستىرامىز.
اكادەميانىڭ اينالاسىندا 13 عىلىمي جۋرنالدان تۇراتىن جەلى قالىپتاسىپ، رەداكتورلار كەڭەسى قۇرىلدى. ونىڭ ماقساتى – قازاقستاندىق باسىلىمداردى حالىقارالىق مالىمەتتىك بازالارعا شىعارۋ جانە جاريالانىمداردىڭ الەمدىك ساپا ستاندارتتارىنا سايكەستىگىن قامتاماسىز ەتۋ.
ءبىر جىل ىشىندە اكادەميا 52 عىلىمي ءىس-شارا ۇيىمداستىردى – كونفەرەنسيالار، فورۋمدار، سەمينارلار. مەديا كەڭىستىگىندە قازاقستان عىلىمى تۋرالى 926 ماتەريال جارىق كوردى، بۇل زەرتتەۋشىلەر ەڭبەگىن قۇرمەتتەۋگە جانە عىلىمي ءبىلىمدى تانىمال ەتۋگە قوسقان ۇلەس بولىپ سانالادى.
بولاشاققا كوزقاراس. 2025 جىل قورىتىندىسىن شىعارا وتىرىپ، ق ر پرەزيدەنتىنىڭ جانىنداعى ۇلتتىق عىلىم اكادەمياسى تەك ءوز قۇرىلىمدارىن جاڭارتۋمەن شەكتەلمەگەنىن اتاپ وتكەن ءجون. اكادەميا ۇلتتىق عىلىمنىڭ جۇمىس ىستەۋ لوگيكاسىن وزگەرتۋگە كىرىستى – جوسپارلاۋدان باستاپ رەسۋرستاردى ءبولۋ، وڭىرلىك ساياسات جانە حالىقارالىق سەرىكتەستىكتەرگە دەيىن.
كەلەسى كەزەڭ – فلاگماندىق باعدارلامالاردى تەرەڭدەتۋ، رەسۋرستاردى سەرپىندى باعىتتارعا شوعىرلاندىرۋ، وڭىرلىك تابىستى تاجىريبەلەردى ماسشتابتاۋ جانە حالىقارالىق ورتالىقتاردى تالانتتى جاستار شوعىرلاندىراتىن ورتالىقتارعا اينالدىرۋ.
اكادەميانىڭ مىندەتى – عىلىمعا سالىنعان ءاربىر ينۆەستيسيانىڭ ەلگە ناقتى پايدا اكەلۋى: جاڭا تەحنولوگيالار، حالىقتىڭ دەنساۋلىعىن جاقسارتۋ، قالالار مەن وڭىرلەردىڭ تۇراقتى دامۋى.