قۇرمەتتى ازاماتتار!
الەۋمەتتىك جەلىلەردە جەكەلەگەن تۇلعالار نۇر-سۇلتان، الماتى، شىمكەنت، اقتوبە، اقتاۋ جانە جاڭاوزەن قالالارىنىڭ اكىمدىكتەرى ا.ج. 1 مامىردا ۋكرايناداعى اسكەري ءىس-قيمىلدارعا قاتىستى ميتينگىلەر وتكىزۋگە كەلىسىم بەرگەن دەپ جالعان حابارلامالار تاراتۋدا.
اتالعان اقپارات شىندىققا سايكەس كەلمەيدى.
بۇل كۇنى اكىمدىكتەر ەلدى مەكەندەردىڭ ورتالىق الاڭدارىندا «قازاقستان حالقىنىڭ بىرلىگى كۇنىن» مەرەكەلەۋگە ارنالعان مادەني-بۇقارالىق ءىس-شارالاردى عانا وتكىزۋدى جوسپارلاپ وتىر.
بۇدان باسقا، ميتينگىلەردى ۇيىمداستىرۋ جانە وتكىزۋ ءتارتىبى 2020 جىلعى 25 مامىردا قابىلدانعان «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭمەن (بۇدان ءارى - زاڭ) رەتتەلەتىنىنە نازار اۋدارامىز.
جينالىستاردى، ميتينگىلەر مەن پيكەتتەردى ۇيىمداستىرۋ جانە وتكىزۋ ءۇشىن حابارلاما جاساۋ ءتارتىبى كوزدەلگەن.
الايدا ۇيىمداستىرۋشىلار جەرگىلىكتى اتقارۋشى ورگاندارعا جوعارىدا اتالعان قالالاردا بەيبىت جينالىستاردى ۇيىمداستىرۋ جانە وتكىزۋ تۋرالى ءتيىستى حابارلامالار بەرمەگەن نە ولار بويىنشا كەلىسۋدەن باس تارتىلعان.
وسىلايشا، وسى زاڭ تارتىبىمەن ۇيىمداستىرىلاتىن بەيبىت جينالىستار ا.ج. 1 مامىرعا قاراستىرىلماعان.
تيىسىنشە، زاڭدى (3-باپتىڭ 3-تارماعى) بۇزا وتىرىپ جۇرگىزىلگەن ميتينگىلەردى ۇيىمداستىرۋ جانە ولارعا قاتىسۋ قۇقىققا قايشى بولىپ تابىلادى جانە اكىمشىلىك قۇقىق بۇزۋشىلىق تۋرالى كودەكستىڭ 488-بابى بويىنشا 25 تاۋلىككە قاماققا الۋعا دەيىن اكىمشىلىك جاۋاپتىلىققا اكەپ سوعادى.
ەگەر بۇل ارەكەتتەر ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرۋمەن قاتار جۇرەتىن بولسا، قىلمىستىق كودەكستىڭ 400-بابى بويىنشا قىلمىستىق جاۋاپتىلىق تۋىندايدى، ول 200 اەك-كە دەيىنگى مولشەردە ايىپپۇل نە تۇزەۋ جۇمىستارى نەمەسە 200 ساعاتقا دەيىنگى مەرزىمگە قوعامدىق جۇمىستارعا تارتۋ نە 50 تاۋلىككە دەيىنگى مەرزىمگە قاماققا الۋ تۇرىندەگى جازانى كوزدەيدى.
باس پروكۋراتۋرا ازاماتتاردى قولدانىستاعى زاڭناما نورمالارىن مۇلتىكسىز ساقتاۋعا، ارانداتۋشىلىققا بوي الدىرماۋعا جانە زاڭسىز اكسيالارعا قاتىسۋدان باس تارتۋعا شاقىرادى.
قۇقىق قورعاۋ ورگاندارى بەلگىلەنگەن تارتىپكە، قوعامدىق قاۋىپسىزدىككە قول سۇعاتىن كەز كەلگەن قۇقىق بۇزۋشىلىقتىڭ جولىن كەسەدى، سونداي-اق ولارعا جول بەرمەۋ بويىنشا زاڭدا كوزدەلگەن شارالاردى قابىلدايدى.