بۇگىندە بۇل كورسەتكىش 1 ميلليارد دوللارعا جەتكەن.
بىشكەكتە قازاقستان-قىرعىز ۇكىمەتارالىق كەڭەسىنىڭ 10-وتىرىسى ءوتتى، دەپ حابارلايدى Almaty-akshamy.kz
قازاقستان پرەمەر-مينيسترى ءاليحان سمايىلوۆ قىرعىزستان قازاقستاننىڭ نەگىزگى ساۋدا-ەكونوميكالىق سەرىكتەستەرىنىڭ ءبىرى عانا ەمەس، سونىمەن قاتار ءداستۇرلى دوستىق قارىم-قاتىناستار بايلانىستىراتىن باۋىرلاس مەملەكەت ەكەنىن اتاپ ءوتتى.
قازاقستان ۇكىمەتىنىڭ باسشىسى ەكى ەل اراسىنداعى تاۋار اينالىمىن ارتتىرۋ ماسەلەسىنە ەرەكشە توقتالدى، ول ءقازىردىڭ وزىندە 1 ميلليارد دوللارعا جەتىپ وتىر.
«البەتتە، ءبىز مۇنىمەن شەكتەلىپ قالمايمىز، ەكى ەلدىڭ الەۋەتى بۇدان دا جوعارى دەپ ەسەپتەيمىن. ءبىزدىڭ الدىمىزدا تۇرعان ەندىگى مىندەت – ءوزارا ساۋدا دەڭگەيىن $2 ملرد-قا دەيىن جەتكىزۋ»، – دەدى ءاليحان سمايىلوۆ.
قويىلعان ماقساتقا قول جەتكىزۋ ءۇشىن تاۋار نومەنكلاتۋراسىن كەڭەيتىپ، يندۋستريالىق ساۋدا-لوگيستيكالىق كەشەندەردى قۇرۋ جونىندەگى جۇمىستى جانداندىرىپ، كولەڭكەلى تاۋار اينالىمىنا قارسى كۇرەس شارالارىن كۇشەيتۋ قاجەت.
ال قىرعىزستان مينيسترلەر كابينەتىنىڭ باسشىسى اقىلبەك جاپاروۆ ەكى حالىق اراسىنداعى تاريح پەن مادەنيەتتىڭ ورتاقتىعىنا، ءوزارا تۇسىنىستىك پەن سەنىمگە نەگىزدەلگەن دوستىق جانە باۋىرلاستىق بايلانىستار ورتاق ماقسات – حالىقتارىمىزدىڭ گۇلدەنۋى مەن ءال-اۋقاتىن ارتتىرۋعا كومەكتەسەتىنىنە سەنىم ءبىلدىردى.
كەزدەسۋ سوڭىندا تاراپتار كەلىسسوزدەردىڭ جەمىستى بولعانىن اتاپ ءوتىپ، تاتۋ كورشىلىك جانە ستراتەگيالىق سەرىكتەستىك رۋحىندا مەملەكەتارالىق بەلسەندى ءىس-قيمىلدى جالعاستىرۋعا دايىن ەكەندەرىن ءبىلدىردى.
كەلىسسوزدەر قورىتىندىسى بويىنشا ۇكىمەتارالىق كەڭەستىڭ 10-وتىرىسىنىڭ حاتتاماسىنا، سونداي-اق «GFC Bishkek» جشق قۇرۋ تۋرالى كەلىسىمگە قول قويىلدى.
كەلىسىم احقو جاسىل قارجى ورتالىعىنىڭ جانە قىرعىزستاندىق سەرىكتەستەر – «ايىل بانك» ااق، «قىرعىز قور بيرجاسى» جاق جانە «قىرعىزستان بانكتەرىنىڭ وداعى» زتب قاتىسۋىمەن بىرلەسكەن كومپانيا قۇرۋدى كوزدەيدى. بىرلەسكەن كومپانيانى قۇرۋ «استانا» حالىقارالىق قارجى ورتالىعىن قىرعىزستاندا جانە ورتالىق ازيا وڭىرىندە ىلگەرىلەتۋگە باعىتتالعان.