ەستەرىڭىزگە سالا كەتسەك، قىرعىزستان كومانداسىنىڭ كوكپارشىلارى ماراپاتتاۋ ءراسىمى كەزىندە ەكىنشى ورىنعا بەرىلگەن مەدالدى شەشىپ تاستاپ، جەڭگەن قازاقستان كومانداسىنىڭ گيمنىن تىڭداماي كەتىپ قالعان بولاتىن.
قازاقستاننىڭ كوكپار فەدەراسياسى قىرعىزستانمەن ريەۆانش ماچىن وتكىزۋدەن باس تارتۋ سەبەبىن ءتۇسىندىردى، دەپ حابارلايدى aqshamnews.kz
فەدەراسيا كوكپاردان وتكەن بەسىنشى دۇنيەجۇزىلىك كوشپەندىلەر ويىندارىنىڭ ناتيجەلەرىنە قاتىستى پىكىر ءبىلدىرىپ، قازاقستان مەن قىرعىزستان كوماندالارى اراسىنداعى فينالدىق ماچ كەزىندە تۋىنداعان داۋلارعا توقتالدى. فەدەراسيا وكىنىشپەن، ويىننان گورى "تۋىنداعان تۇسىنىسپەۋشىلىكتەر" كوپشىلىك نازارىن اۋدارعانىن ايتتى.
"بىرىنشىدەن، ەرەجە بۇزعان قازاقستاندىق سپورتشى جازالانىپ، ەكى مينۋتقا ايىپ الاڭىنا جىبەرىلدى. ەكىنشىدەن، قىرعىز دەلەگاسياسىنان تورەشىلەرگە رەسمي نارازىلىق تۇسپەدى. قازاقستاننىڭ كوكپار فەدەراسياسى بارلىق داۋلار سپورتتىق ەتيكا اياسىندا شەشىلۋى كەرەك ەكەنىن اتاپ كورسەتەدى. سونداي-اق، ءبىز الەۋمەتتىك جەلىلەردە قازاقستاندىق سپورتشىلارعا قاتىستى ايتىلعان جاعىمسىز پىكىرلەر مەن قورلاۋدى ايىپتايمىز"،-دەپ اتاپ ءوتتى فەدەراسيا وكىلدەرى.