حيۋستوندا ەڭ ۇلكەن FIRST Championship چەمپيوناتى اياقتالدى. وعان الەمنىڭ 55-تەن استام ەلىنەن 50 مىڭ وقۋشى قاتىستى.
بيىل قازاقستان قۇراماسىندا FIRST LEGO LEAGUE EXPLORE كىشى ساناتىندا استانا قالاسىنىداعى Quantum STEM School مەكتەبىنەن IQ Robots كومانداسى، FIRST LEGO LEAGUE CHALLENGE ورتا ساناتىندا - شىمكەنت قالاسى Robopark مەكتەبىنەن Shymside كومانداسى، ال FIRST Tech CHALLENGE جوعارى ساناتىندا - الماتى قالاسىنداعى فمب نزم-نەن Yaku كومانداسى جانە الماتى قالاسىنداعى رفمم-نەن Bolt.M3 كومانداسى بولدى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
بيىلعى قۇرامانىڭ ناتيجەلەرى:
6-10 جاس ارالىعىنداعى باستاۋىش سىنىپ وقۋشىلارى قاتىساتىن IQ Robots كومانداسى ۇزدىك تانىستىرىلىم جانە جوبا يدەياسى ءۇشىن Best Poster Award نوميناسياسىندا جەڭىسكە جەتتى.
جوعارى سىنىپ وقۋشىلارىنان قۇرالعان Bolt.M3 كومانداسى Motivate Award بەدەلدى جۇلدەسىن قانجىعالادى. ايتا كەتۋ كەرەك، بۇل ماراپات ءوز ەلىندە جانە ودان تىس جەرلەردە STEMء-دى تانىمال ەتۋگە ۇلەس قوسقان كومانداعا بەرىلەدى.
سونداي-اق، 10-16 جاس ارالىعىنداعى وقۋشىلاردى بىرىكتىرگەن Shymside كومانداسى جاھاندىق STEM قوزعالىسىنىڭ ماڭىزدى كريتەرييى بولىپ تابىلاتىن FIRST باعدارلاماسىنىڭ كوماندالىق رۋحى مەن نەگىزگى قۇندىلىقتارىن كورسەتتى. سونىمەن قاتار، ءىس-شارا ۇيىمداستىرۋشىلارى Shymside كومانداسىن وسى ماۋسىمعا ارنالعان دەرەكتى فيلمگە ءتۇسىردى.
«ءبىزدىڭ بالالار چەمپيوناتتىڭ بارلىق ءۇش كۇنىندە كوشباسشىلار قاتارىنان كورىندى. ولاردىڭ الاڭداعى ويىندارىن، جەڭىستەرى مەن جەڭىلىستەرىن كورۋ، قازىلار القاسىنىڭ مۇشەلەرىمەن سۇحباتىن كۋلۋاردا كۇتۋ ساتتەرى وتە قىزىقتى بولدى. بالالارىمىزدا وتە مىقتى روبوتتار، ينجەنەرلىك جوبالار، ايدەنتيكا جانە نەگىزگى قۇندىلىقتار بار. ءبىزدىڭ بالالارىمىزدى الەمنىڭ تۇكپىر - تۇكپىرىنەن جينالعان 50000-نان استام وقۋشى اراسىندا بايقاماۋ مۇمكىن ەمەس. ماسەلەن Bolt.M3 كومانداسى يەلەنگەن جۇلدە تمد ەلدەرىنىڭ اراسىنداعى مۇنداي العاشقى ماراپات» - دەيدى «دارىن» رعپو ديرەكتورى عاجدەمبەك تۇرسىنوۆ.
ەستەرىڭىزگە سالا كەتەيىك، قازاقستان قۇراماسى وقۋ-اعارتۋ مينيسترلىگىنىڭ قولداۋىمەن «USTEM Foundation» قوعامدىق قورى مەن «دارىن» رعپو ۇيىمداستىرعان Central Asia FIRST Championship ورتالىق ازيا چەمپيوناتىنىڭ ناتيجەسى نەگىزىندە جاساقتالعان بولاتىن. چەمپيوناتتا جەڭىسكە جەتكەن وقۋشىلار الەمدىك جوعارى وقۋ ورىندارىنداعى ستيپەنديالار مەن گرانتتارعا قول جەتكىزۋگە مۇمكىندىك الادى.