قازاقستاندىق قۇقىقتانۋشى-عالىم ەركىن وڭعاربايەۆ پرەزيدەنت سايلاۋىنداعى حالىقتىڭ بەلسەندىلىگى تۋرالى پىكىر ءبىلدىردى.
ونىڭ ايتۋىنشا حالىقتىڭ بەلسەندىلىگى وسكەن. كۇنى كەشە وتكەن سايلاۋعا قاتىستى قۇقىقتانۋشى ءوز ويىن ءبىلدىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەنىڭ ويىمشا، قازاقستاندا سايلاۋ قۇقىعى دەڭگەيى ايتارلىقتاي ءوستى. حالىقتىڭ بەلسەندىلىگى جوعارى، اسىرەسە رەفەرەندۋم كەزىندە بۇعان كۋا بولعان ەدىك. بۇل جولى دا قوعامنىڭ سايلاۋدى ءادىل وتكىزۋگە دەگەن سۇرانىسى جوعارى بولدى. بۇل تۇپكى ناتيجەگە اسەر ەتەدى. بۇگىندە كوپتەگەن ماسەلە شەشىمىن تاۋىپ جاتىر. قاڭتار وقيعاسىنان كەيىن كونستيتۋسياعا ءبىرقاتار وزگەرىس ەنگىزىلدى. ءبىز ءقازىر ادام قۇقىعىن قورعاۋ فۋنكسياسىنىڭ ارتىپ كەلە جاتقانىن، كونستيتۋسيالىق سوتتىڭ قۇرىلعانىن، قۇقىقتىق قورعاۋدىڭ جوعارى دەڭگەيىن، ادام قۇقىقتارى جونىندەگى كونستيتۋسيالىق زاڭنىڭ ۇستەمدىگىن كورىپ وتىرمىز. مۇنىڭ ءبارى بىزدە ازاماتتىڭ قۇقىقتارى مەن بوستاندىقتارىنىڭ وتە جوعارى قورعالۋىنا ىقپال ەتەدى»، - دەدى ەركىن وڭعاربايەۆ Jibek Joly تەلەارناسىنداعى سايلاۋ تاقىرىبىنا ارنالعان توك-شوۋدا.
ونىڭ ايتۋىنشا، جەر قويناۋى بايلىعىنىڭ حالىققا تيەسىلى بولۋى - ماڭىزدى رەفورما.
«ءبىز جوعارىدا اتالعان ماسەلەنى بىرنەشە رەت تالقىلاپ، ونىڭ ىسكە اساتىنىن ايتتىق. ەلىمىزدىڭ بولاشاعى - وسكەلەڭ ۇرپاق تابىسقا يە بولماق. بۇل دا - اۋقىمدى شارۋا. حالىقتىڭ ءال-اۋقاتى كوپتەگەن ەلدەردەگىدەي، سونىڭ ىشىندە اراب ەلدەرىندەگىدەي وسەتىنىنە كۇمانىم جوق. كىرىس كوبەيىپ، ازاماتتارىمىز جەر قويناۋىنداعى پايدالى قازبالاردان تابىس تابادى. الايدا، نەگىزگى سۇرانىس - الەۋمەتتىك ادىلەتتىلىك پەن وليگارحيامەن كۇرەسكە قاتىستى. ەگەر ادىلەت سالتانات قۇرىپ، شەتەلدەگى قارجى قايتارىلسا، مەنىڭ ويىمشا، قوعام ونى قۋانا قابىلدايدى. ەگەر قوعامنىڭ ءۇمىتى اقتالسا، بولاشاقتا سايلاۋشىلاردىڭ تۇلعالاردى قولداۋى ارتادى دەپ ويلايمىن»، - دەيدى ول.