باعدارلامانىڭ ءبىرى – «جاسوسپىرىمدەردىڭ وركەندەۋىنە ىقپال ەتۋ» ادىستەمەلىك ماتەريالدار جيىنتىعى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە قر-داعى ددۇ ەلدىك ءوفيسىنىڭ قازاقستانداعى جانە ورتالىق ازيا ەلدەرىندەگى پسيحيكالىق دەنساۋلىق جونىندەگى ۇلتتىق كەڭەسشىسى نيكولاي نەگاي مالىمدەدى، دەپ حابارلايدى Almaty-akshamy.kz
نيكولاي نەحاي پسيحياتريا سالاسىنداعى قازاقستاندىق ماماندار قۇرۋعا كومەكتەسكەن باعدارلامالار تۋرالى ايتىپ بەردى. ولاردىڭ ءبىرى – «جاسوسپىرىمدەردىڭ وركەندەۋىنە ىقپال ەتۋ» ادىستەمەلىك ماتەريالدار جيىنتىعى.
ۇلتتىق كەڭەسشىنىڭ پىكىرىنشە، بۇكىل الەمدە جاسوسپىرىمدەر مەن جاستاردىڭ پسيحيكالىق دەنساۋلىعىنا الاڭداۋشىلىق ارتىپ كەلەدى. سوندىقتان دۇنيەجۇزىلىك دەنساۋلىق ساقتاۋ ۇيىمى مەن بۇۇ بالالار قورىنىڭ (يۋنيسەف) باستاماسىمەن 2021 جىلدىڭ كوكتەمىندە جاسوسپىرىمدەردىڭ پسيحيكالىق دەنساۋلىعىن نىعايتۋ جانە قورعاۋ، ءقاۋىپتى مىنەز-قۇلىقتىڭ ءتۇرلى نىساندارىنىڭ الدىن الۋ ستراتەگياسى جاريالاندى.
ايتا كەتەرلىگى، قازاقستاندىق ماماندار وسى ادىستەمەلىك ماتەريالدار پاكەتىن ازىرلەۋگە دە قاتىستى. باستامانىڭ نەگىزىندە بارلىق ازاماتتىق قوعام جاسوسپىرىمدەردىڭ پسيحيكالىق دەنساۋلىعىن ساقتاۋ جانە نىعايتۋ بويىنشا بىرلەسىپ شارالار قابىلداۋ ءۇشىن مەملەكەتتىك قۇرىلىمدارمەن كۇش بىرىكتىرەتىن تۇجىرىمداما جاتىر.
سونىمەن قاتار، پسيحياترلار ددسۇ-نىڭ Caregiver Skills Training (بالالارعا كۇتىم جاساۋ داعدىلارىن ۇيرەتۋ) باعدارلاماسىن دامۋىندا كەمىستىگى بار جانە ارتتا قالعان بالالاردى تاربيەلەپ وتىرعان وتباسىلار ءۇشىن ازىرلەگەن.
«دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق بيۋروسىنىڭ قولداۋىمەن رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى بۇل باعدارلامانى قازاقستاندا وسى جىلدىڭ قاڭتار ايىندا ىسكە قوستى. باعدارلامانى قازاقستاندىق ماماندار اۋدارىپ، بەيىمدەپ، شەبەر ترەنەرلەر دايىندادى، كەيىن ولارعا جەتەكشىلىك ەتتى»، - دەدى نيكولاي نەگاي.
بەيىمدەۋ جۇمىستارىنا «قازاقستاننىڭ اۋتيزم جانە باسقا دا دامۋ پروبلەمالارى بار بالالارى مەن جاسوسپىرىمدەرىنە قولداۋ كورسەتۋ، كومەك كورسەتۋ قورى «اشىق الەم» ۇەۇ جانە «Autism قولجەتىمدى ورتا» جەكە قورى تارتىلدى.
بۇگىندە باعدارلاما بەيىمدەلىپ، اۋىستىرىلدى، العاشقى مەديسينالىق-سانيتارلىق جەلىدەن كوماندالار قۇرىلدى، ترەنينگتەر تەستىلەندى. 2022 جىلى ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلاردى جاپپاي قامتۋ مىندەتى تۇر.
وتاندىق پسيحياترلار جۇمىس ىستەيتىن ءۇشىنشى باعدارلاما – ءوزىن-وزى زاقىمداۋ مونيتورينگى جۇيەسىن ەنگىزۋ.
نيكولاي نەگايدىڭ ايتۋىنشا، مونيتورينگ بارىسىندا جينالعان مالىمەتتەر وزىنە-وزى قول جۇمساۋ جانە وزىنە-وزى زيان كەلتىرۋ ارەكەتتەرىن انىقتاۋدىڭ ماڭىزدى قۇرامداس بولىگى بولىپ تابىلادى. اناليتيكالىق وڭدەۋدەن كەيىن مۇنداي اقپاراتتى دالەلدەرگە نەگىزدەلگەن ساياسات پەن ودان ءارى ءىس-قيمىل جوسپارلارىن قالىپتاستىرۋدا قولدانۋعا بولادى.
بۇل ءادىس رەسەي مەن يرلانديا پراكتيكاسىنا ەندى، تۇركىستان جانە قوستاناي وبلىستارىندا دا ەنگىزىلدى.
نيكولاي نيگاي ايتقان ءتورتىنشى باعدارلاما پسيحياتريالىق ەمەس بەيىندەگى ماماندار ءۇشىن پسيحيكالىق دەنساۋلىق ماسەلەلەرى بويىنشا ولقىلىقتاردى تولىقتىرۋعا ارنالعان.
«بۇل - جالپى پراكتيكا دارىگەرىنىڭ جانە باسقا ماماندىقتاردىڭ تاجىريبەسىندەگى پسيحيكالىق دەنساۋلىقتىڭ ءجيى كەزدەسەتىن بۇزىلۋلارى تۋرالى باعدارلاما. بۇگىندە تولىقتاي بەيىمدەلىپ، مەملەكەتتىك تىلگە اۋدارىلعان اتالعان باعدارلاما بويىنشا س.د. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىندە ءبىلىم بەرىلۋدە»، - دەدى نيكولاي نەگاي.
ونى بەيىمدەۋ ءۇشىن پراكتيكالىق دارىگەرلەر، ءتۇرلى ماماندىقتاعى عالىمدار شاقىرىلدى.