قازاقستان پرەزيدەنتىنىڭ ءازىربايجانعا رەسمي ساپارى اياقتالدى

كەلىسسوزدەر جۇرگىزىلدى

مەملەكەت باسشىسىنىڭ ءازىربايجانعا رەسمي ساپارى اياقتالدى. قاسىم-جومارت توقايەۆ پەن يلحام الييەۆ جىلى قوشتاستى، دەپ حابارلايدى Almaty-akshamy.kz بورت№1 Telegram كانالىنا سىلتەمە جاساپ.
ايتا كەتەيىك، بۇگىن مەملەكەت باسشىسى رەسمي ساپارمەن ءازىربايجانعا بارىپ، يلحام الييەۆپەن كەزدەستى. سونداي-اق پرەزيدەنت ءازىربايجان باسشىسىمەن كەڭەيتىلگەن قۇرامدا كەلىسسوزدەر جۇرگىزىپ، ەكى ەل اراسىندا ماڭىزدى ءبىرقاتار قۇجاتقا قول قويىلدى.
كەلىسسوزدەردىڭ ناتيجەسى بويىنشا مەملەكەتتەر باسشىلار مالىمدەمە جاسادى.

«ءبىز ىقپالداستىقتى باسىنان باستادىق جانە بۇگىندە ءبىز ەلدەرىمىز اراسىنداعى ستراتەگيالىق سەرىكتەستىك پەن وداقتاستىق تۋرالى سەنىمدى تۇردە ايتا الامىز. وسى سەرىكتەستىگىمىزدى ودان ءارى نىعايتۋ، ونى ءارتاراپتاندىرۋ تۋرالى دەكلاراسياعا قول قويىلدى. بۇل – العا قاراي جاسالعان ناقتى قادام. ارامىزدا سەنىمدى ساياسي ديالوگ ورنادى، مەملەكەتتەرىمىز حالىقارالىق الاڭداردا، ەڭ الدىمەن بىرىككەن ۇلتتار ۇيىمى، ەقىۇ، تۇرىك مەملەكەتتەرىنىڭ ۇيىمى اياسىندا ىنتىماقتاسىپ كەلەدى.
وتكەن جىلدىڭ قورىتىندىسى بويىنشا ءوزارا تاۋار اينالىمىنىڭ كولەمى 3 ەسە ارتقانىن اتاپ وتكىم كەلەدى، ياعني ءوسۋ قارقىن ساقتالىپ كەلەدى. الايدا جالپى العاندا، بۇل ناتيجە ايتارلىقتاي كوپ ەمەس، سوندىقتان بۇگىن ءوزارا ساۋدانىڭ ءابسوليۋتتى كورسەتكىشىن ارتتىرۋعا كۇش سالۋ جونىندەگى ۋاعدالاستىققا قول جەتتى. مۇمكىن جاقىن بولاشاقتا ميلليرادتىق مەجە تۋرالى ايتاتىن بولارمىز»، - دەدى قاسىم-جومارت توقايەۆ.