ەلىمىزدە قىلمىستىڭ كوپتەگەن تۇرلەرىن اشۋ كورسەتكىشتەرى جاقسارعان.
مەملەكەت باسشىسى قاسىم-جومارت توقايەۆ ىشكى ىستەر ءمينيسترى ەرلان تۇرعىمبايەۆتى قابىلدادى، دەپ حابارلايدى Almaty-akshamy.kz Akorda.kz cايتىنا سىلتەمە جاساپ.
پرەزيدەنتكە ەلدەگى قازىرگى كريمينوگەندىك احۋال مەن ىشكى ىستەر ورگاندارى جۇمىسىنىڭ ناتيجەلەرى تۋرالى باياندالدى.
ەرلان تۇرعىمبايەۆتىڭ ايتۋىنشا، ۆەدومستۆو قىلمىستىڭ كوپتەگەن تۇرلەرىن اشۋ كورسەتكىشتەرىن جاقسارتقان. كىسى ءولتىرۋ، توناۋ، بۇزاقىلىق، ۇرلىق، سونداي-اق، كامەلەتتىك جاسقا تولماعاندار جاساعان قۇقىق بۇزۋشىلىقتار سانى ازايعان. قوعامدىق ورىندار مەن كوشەدەگى قاۋىپسىزدىك دەڭگەيى جوعارىلاعان. الايدا، ينتەرنەت جەلىسىن پايدالانۋ ارقىلى جاسالاتىن الاياقتىق قىلمىستار سانى ارتقان. بۇعان پاندەميا كەزىندەگى ونلاين-قىزمەتتەردىڭ ءوسۋى ىقپال ەتتى.
مەملەكەت باسشىسىنا ۆاكسينا العاندىعى جونىندە جالعان قۇجاتتار تاراتۋدىڭ جولىن كەسۋ بويىنشا قابىلدانىپ جاتقان شارالار تۋرالى ايتىلدى. جىل باسىنان بەرى پوليسيا ورگاندارى 50 جالعان ۆاكسينالاۋ پاسپورتتارىن جانە 60 جالعان پتر-انىقتامالارىن جاساعانى ءۇشىن 110 قىلمىستىق ءىس قوزعاعان.
مينيستر ءىىم بولىمشەلەرىندەگى جەكە قۇرام قىزمەتكەرلەرىنىڭ 96 پايىزى ەكپە العانىن جەتكىزدى.
كەزدەسۋ قورىتىندىسى بويىنشا قاسىم-جومارت توقايەۆ مينيسترلىككە باسقا مەملەكەتتىك ورگاندارمەن بىرلەسىپ، كارانتيندىك شارالاردى قامتاماسىز ەتۋگە ەرەكشە كوڭىل ءبولۋدى، سونداي-اق، كامەلەتكە تولماعاندارعا قارسى قىلمىستاردىڭ، تۇرمىس سالاسىنداعى قۇقىق بۇزۋشىلىقتاردىڭ الدىن الۋ جانە جول قاۋىپسىزدىگىن قامتاماسىز ەتۋ جونىندەگى جۇمىستى جانداندىرۋدى تاپسىردى.