كومپانيانىڭ ۇسىنعان ينۆەستيسيالىق ۇسىنىستارى وڭ باعالاندى.
مەملەكەت باسشىسى قاسىم-جومارت توقايەۆ Svevind Group كومپانياسىنىڭ پرەزيدەنتى ۆولفگانگ كروپپتى قابىلدادى، دەپ حابارلايدى Almaty-akshamy.kz Akorda.kz سىلتەمە جاساپ.
Svevind Group نەمىس-شۆەد كومپانيالار توبىنىڭ باسشىسى قازاقستان پرەزيدەنتىنە «جاسىل» ەنەرگەتيكا سالاسىنداعى ينۆەستيسيالىق جوبالاردى جۇزەگە اسىرۋدىڭ پەرسپەكتيۆالارى تۋرالى ايتتى.
اتاپ ايتقاندا، ماڭعىستاۋ وبلىسىندا جەل جانە كۇن ەلەكتر ستانسيالارىنىڭ قۇرىلىسىنا قاتىستى جوبانى ىسكە اسىرۋ جانە سودان كەيىن رەسۋرستاردى «جاسىل» سۋتەگى وندىرىسىنە ءبولۋ جوسپارلانىپ وتىر. سونىمەن قاتار جەل گەنەراتورلارى مەن كۇن ەنەرگياسىن وندىرەتىن پانەلدەردى جەرگىلىكتى جەردە شىعارۋ مۇمكىندىگى قاراستىرىلۋدا.
قاسىم-جومارت توقايەۆ جاڭارتىلاتىن قۋات كوزدەرىن پايدالانۋعا جانە ەل ەكونوميكاسىنداعى كومىرتەگىنە تاۋەلدىلىكتى تومەندەتۋگە باسىمدىق بەرەتىنىن ايتتى. ونىڭ پىكىرىنشە، سۋتەگى ەنەرگەتيكاسىنا ارنايى نازار اۋدارۋ كەرەك.
مەملەكەت باسشىسى كومپانيانىڭ ۇسىنعان ينۆەستيسيالىق ۇسىنىستارىن وڭ باعالاپ، ۆولفگانگ كروپپقا مەملەكەت تاراپىنان قولداۋ كورسەتىلەتىنىن ايتتى.
