اقشا اۋدارعا كاسىپكەرلەرگە العىسىن ءبىلدىردى.
مەملەكەت باسشىسى قاسىم-جومارت توقايەۆ «قازاقستان حالقىنا» قورىنا قايىرىمدىلىق جاساماعان وليگوپوليا وكىلدەرىنە ۇندەۋ جاسادى، دەپ حابارلايدى Almaty-akshamy.kz.
Nur Otan پارتياسىنىڭ سەزىندە سويلەگەن سوزىندە پرەزيدەنت قورعا قارجى اۋدارعان كاسىپكەرلەرگە العىسىن ءبىلدىرىپ، ولار قايىرىمدىلىق كومەككە مۇقتاج قازاقستاندىقتارعا ازاماتتىق جاۋاپكەرشىلىك تانىتقانىن اتاپ ءوتتى.
«سونىمەن بىرگە، وليگوپوليانىڭ قۇرامىنا كىرەتىن جانە ءتىپتى ونىڭ بەت-بەينەسىنە اينالعان بيزنەستەگى كەيبىر تانىمال ادامدار مەملەكەت باسشىسى باستاعان قايىرىمدىلىق اكسياسىنا قاتىسۋعا اسىعاتىن ەمەس. بۇل نە: اشكوزدىك پە، نيگيليزم بە، ادەپسىزدىك نەمەسە نەمقۇرايلىلىق پا؟ قالاي بولعاندا دا، مەملەكەت بۇل سۇراققا تولىق جاۋاپ الۋ ءۇشىن قاجەتتى بارلىق وكىلەتتىكتەرگە يە»، - دەدى مەملەكەت باسشىسى.
سونىمەن قاتار قاسىم-جومارت توقايەۆ ءىرى بيزنەس وكىلدەرىنىڭ قايىرىمدىلىق جاساۋ پروسەسىن رەتتەيتىن ارنايى جارلىق شىعارۋدى جوسپارلاپ وتىرعانىن ايتتى.