مەملەكەت باسشىسى قاسىم-جومارت توقايەۆ قوس كيەنىڭ ساقشىسى – ساۋد ارابياسىنىڭ كورولى سالمان بەن ابدەلازيز ءال ساۋدتىڭ شاقىرۋىمەن دجيددا قالاسىنا رەسمي ساپارمەن كەلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان پرەزيدەنتىن اۋەجايدا كورولدىڭ كەڭەسشىسى ءارى مەككە پروۆينسياسىنىڭ گۋبەرناتورى فەيسال حاليد بەن ابدەلازيز، سونداي-اق ساۋد ارابياسى كورولدىگىنىڭ قورشاعان ورتانى قورعاۋ، سۋ رەسۋرستارى جانە اۋىل شارۋاشىلىعى ءمينيسترى ابدۋراحمان ءال-فادلي قارسى الدى.
سودان كەيىن پرەزيدەنت رەسمي كەزدەسۋ وتكىزۋ ءۇشىن كورولدىڭ «قاسر اس-سالام» سارايىنا باردى. قۇرمەت قاراۋىلىنىڭ باستىعى ەكى ەل باسشىلارىنا راپورت بەردى. قازاقستان مەن ساۋد ارابياسىنىڭ ءانۇراندارى شىرقالعاننان كەيىن قاسىم-جومارت توقايەۆ پەن تاق مۇراگەرى مۇحاممەد بەن سالمان بەن ابدەلازيز ءال ساۋدقا رەسمي دەلەگاسيالاردىڭ مۇشەلەرى تانىستىرىلدى.
بۇدان كەيىن مەملەكەت باسشىسى مەن تاق مۇراگەرى كەلىسسوز جۇرگىزدى. قاسىم-جومارت توقايەۆ مۇحاممەد بەن سالمان بەن ابدەلازيز ءال ساۋدقا ءىلتيپات ءبىلدىرىپ، شاقىرعانى جانە قوناقجايلىق كورسەتكەنى ءۇشىن ساۋد ارابياسىنىڭ كورولى مەن تاق مۇراگەرىنە العىس ايتتى.
قازاقستان پرەزيدەنتىنىڭ ايتۋىنشا، مەملەكەت باسشىسى رەتىندە ساۋد ارابياسىنا العاش رەت كەلگەندىكتەن، بۇل ساپاردىڭ ماڭىزى زور. قاسىم-جومارت توقايەۆ ساۋد ارابياسى قازاقستاننىڭ باستى ستراتەگيالىق سەرىكتەستەرىنىڭ ءبىرى ەكەنىن اتاپ ءوتتى.
– ساۋد ارابياسى – قازاقستاننىڭ تاۋەلسىزدىگىن ءبىرىنشى بولىپ مويىنداعان ەلدەردىڭ ءبىرى. وسى كەزەڭدە ءتۇرلى باعىتتاعى ىنتىماقتاستىعىمىز نىعايا ءتۇستى. ءقازىر قازاق-ساۋد قاتىناستارى جوعارى دەڭگەيدە. دەگەنمەن، ەكى ەل اراسىنداعى ىنتىماقتاستىققا تىڭ سەرپىن بەرەتىن كەز كەلدى. بۇل – ەلدەرىمىزدىڭ مۇددەسىنە ساي كەلەتىن ورتاق شەشىم. ءبىزدىڭ ءوزارا ءتيىمدى بايلانىستارىمىز نىعايا بەرەدى دەپ سەنەمىن، – دەدى مەملەكەت باسشىسى.
كەلىسسوز بارىسىندا ساۋدا-ەكونوميكالىق جانە ينۆەستيسيالىق ىنتىماقتاستىق ماسەلەلەرى تالقىلاندى. قازاقستان ساۋد ينۆەستورلارى ءۇشىن ءوزارا مۇددەنى كوزدەيتىن ءتۇرلى پەرسپەكتيۆتى سالالار بويىنشا ەرەكشە شارتتار مەن كەڭ كولەمدە ارتىقشىلىقتار ۇسىنۋعا دايىن. تاراپتار ءوزارا تاۋار اينالىمىن ەداۋىر ارتتىرۋعا نيەتتى ەكەنىن جانە جۋىق ارادا ەكى ەل ۇكىمەتتەرىنىڭ بۇل باعىتتاعى جۇمىستاردى جانداندىراتىنىن ناقتىلادى. مۇحاممەد بەن سالمان بەن ابدەلازيز ءال ساۋد ەلدەرىمىز اراسىنداعى قاتىناستار دەڭگەيى جاقسى ەكەنىن اتاپ ءوتىپ، ونى ءارى قاراي نىعايتىپ، دامىتۋ ءۇشىن مۇمكىندىكتەر مول ەكەنىن ايتتى.
سونداي-اق بۇل باعىتتاعى جۇمىستاردى جانداندىرۋ قاجەت ەكەنىنە توقتالدى. ونىڭ ايتۋىنشا، بۇل رەتتە قازاقستان مەن ساۋد ارابياسىنىڭ بيزنەسمەندەرىن بىرىكتىرەتىن ىسكەرلىك كەڭەستىڭ ءرولى زور بولماق. تاق مۇراگەرى مەملەكەت باسشىسىنىڭ رەسمي ساپارى اياسىندا وتەتىن ينۆەستيسيالىق دوڭگەلەك ۇستەلگە كورولدىكتىڭ ءىرى كومپانيالارىنىڭ وكىلدەرى قاتىساتىنىن جەتكىزدى.
ونىڭ ايتۋىنشا، قازىرگى جاعدايدا ساۋد ارابياسىنىڭ مەملەكەتتىك ينۆەستيسيالىق قورى ۇيلەستىرەتىن ءبىرقاتار جوبا بويىنشا بىرلەسكەن جۇمىس ماڭىزدى سانالادى. اتاپ ايتقاندا، مۇحاممەد بەن سالمان بەن ابدەلازيز ءال ساۋد كورولدىكتىڭ كومپانيالارى قازاقستاننىڭ اگرارلىق سالاسىنا ينۆەستيسيا سالۋعا قىزىعۋشىلىق تانىتىپ وتىر. ونىڭ پىكىرىنشە، بۇل باعىت جاھاندىق ازىق-تۇلىك داعدارىسى جاعدايىندا اسا وزەكتى بولا تۇسەدى. قاسىم-جومارت توقايەۆ تاق مۇراگەرىن قازاقستانعا مەملەكەتتىك ساپارمەن كەلۋگە شاقىردى.
مۇحاممەد بەن سالمان بۇل شاقىرۋدى قۋانا قابىلدايتىنىن ايتىپ، قول جەتكىزىلگەن ۋاعدالاستىقتاردى جۇزەگە اسىرۋدىڭ ناقتى ناتيجەلەرىن تالقىلاۋ ءۇشىن قازاقستانعا ساپارمەن كەلۋگە دايىن ەكەنىن جەتكىزدى.