قازاقستان پرەزيدەنتى بۇۇ باس حاتشىسىمەن كەلىسسوز وتكىزدى
مەملەكەت باسشىسى قاسىم-جومارت توقايەۆ بەينەكونفەرەنسيا رەجيمىندە بۇۇ باس حاتشىسى انتونيۋ گۋتەرريشپەن كەزدەسۋ وتكىزدى، دەپ حابارلادى Almaty-akshamy.kz پرەزيدەنتتىڭ اkorda.kz سايتىنا سىلتەمەلەپ.
كەلىسسوز بارىسىندا قازاقستاننىڭ بىرىككەن ۇلتتار ۇيىمىمەن اراداعى ىنتىماقتاستىعىنىڭ باسىم باعىتتارى تالقىلاندى. پاندەمياعا جانە كليماتتىڭ وزگەرۋىنە قارسى كۇرەسكە، سونداي-اق، وڭىرلىك قاۋىپسىزدىك پەن تۇراقتىلىقتى قامتاماسىز ەتۋ ءۇشىن كۇش جۇمىلدىرۋعا ەرەكشە نازار اۋدارىلدى.
قاسىم-جومارت توقايەۆ انتونيۋ گۋتەرريشتىڭ بۇۇ باسشىسى لاۋازىمىنا ەكىنشى مەرزىمگە ۇسىنعان كانديداتۋراسىن قازاقستاننىڭ قولدايتىنىن ناقتىلادى.
تاراپتار اۋعانستانداعى احۋالعا بايلانىستى وڭىرلىك قاۋىپسىزدىك پەن تۇراقتىلىقتى قامتاماسىز ەتۋ ماسەلەسىن جان-جاقتى قاراستىردى. مەملەكەت باسشىسى اۋعانستانعا كورسەتىلەتىن كومەكتى جالعاستىرۋعا دايىن ەكەنىن جانە سول ەلدەگى تۇراقتىلىقتى قالپىنا كەلتىرۋگە باعىتتالعان حالىقارالىق ءىس-قيمىلدارعا اتسالىساتىنىن ايتتى. بۇل رەتتە بۇۇ باس حاتشىسى اتالعان ۇدەرىستى ىلگەرىلەتۋدەگى ورتالىق ازيا مەملەكەتتەرىنىڭ، سونىڭ ىشىندە قازاقستاننىڭ ايرىقشا ءرولىن اتاپ ءوتتى.
قاسىم-جومارت توقايەۆ بۇۇ باس حاتشىسىنا كوروناۆيرۋسقا قارسى كۇرەس جونىندە قابىلدانىپ جاتقان شارالار، ونىڭ ىشىندە، QazVac وتاندىق ۆاكسيناسىنىڭ ازىرلەمەسى تۋرالى مالىمەت بەردى. سونداي-اق وسى جىلدىڭ سوڭىنا دەيىن حالىقتىڭ 55 پايىزىنا ەكپە سالۋ جوسپارىن جەتكىزدى. انتونيۋ گۋتەرريش كوروناۆيرۋس ىندەتىنە قارسى قازاقستاندىق ۆاكسينانىڭ ازىرلەمەسىن جانە جاپپاي ەكپە سالۋ ناۋقانىنىڭ تابىستى جۇرگىزىلىپ جاتقانىن قۇپتادى.
بۇۇ باس حاتشىسى تەڭىزگە شىعاتىن جولى جوق دامۋشى ەلدەر توبىنا كىرەتىن مەملەكەتتەردىڭ مۇددەسىن قورعاۋعا باعىتتالعان قازاقستاننىڭ باستاماسىن قۇپتادى. بۇل، اسىرەسە، پاندەميا سالدارىنان تۋىنداعان داعدارىس كەزىندە وزەكتى بولىپ وتىر.
قازاقستان پرەزيدەنتى بيىلعى قاراشا ايىندا گلازگودا وتەتىن سور26 دۇنيەجۇزىلىك كليمات كونفەرەنسياسىنا قاتىسۋعا نيەتتى ەكەنىن جەتكىزدى. اتالعان جيىن بارىسىندا 2060 جىلعا قاراي قازاقستاننىڭ كومىرتەگىنەن ادا ەل بولۋعا قول جەتكىزۋ جونىندەگى جاڭارتىلعان ۇلتتىق شارالارى جاريالانادى.
انتونيۋ گۋتەرريش قازاقستاننىڭ يادرولىق قارۋعا قارسى جاھاندىق ماسەلەنى ىلگەرىلەتۋدەگى كوشباسشىلىعىن جوعارى باعالادى. مەملەكەت باسشىسى بۇۇ باس حاتشىسىن سەمەي پوليگونىنىڭ جابىلعانىنا 30 جىل تولۋىنا وراي تامىز ايىندا ەلىمىزدە وتكىزىلەتىن حالىقارالىق كونفەرەنسياعا شاقىردى.
اڭگىمەلەسۋ سوڭىندا تاراپتار ورتاق مۇددەنى كوزدەيتىن اۋقىمدى ماسەلەلەر بويىنشا جاسالاتىن تىعىز بايلانىستاردى جالعاستىرۋ جونىندە ۋاعدالاستىققا قول جەتكىزدى.