«ارداگەرلەر ۇيىمى» اتقارىپ جاتقان جۇمىس تۋرالى ايتىلدى.
پرەزيدەنت قاسىم-جومارت توقايەۆ «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى باقتىقوجا ىزمۇحامبەتوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆقا «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ اتقارىپ جاتقان جۇمىسى مەن الداعى جوسپارى تۋرالى ايتىلدى.
«ارداگەرلەر ۇيىمى» رەسپۋبليكالىق قوعامدىق بىرلەستىك جانىنان جالپىۇلتتىق رەفەرەندۋم وتكىزۋدى قولداۋ جونىندەگى شتاب قۇرىلعان. باقتىقوجا ىزمۇحامبەتوۆتىڭ ايتۋىنشا، شتابتىڭ جۇمىسى ەكى باعىتتا جۇرگىزىلىپ جاتىر. ءبىرىنشى، كونستيتۋسياعا ەنگىزىلەتىن وزگەرىستەردىڭ ءمان-ماعىناسىن ءتۇسىندىرۋ. ەكىنشى باعىت رەفەرەندۋمعا بەلسەندى تۇردە قاتىسۋ ماسەلەسىن قامتيدى.
سونىمەن قاتار ەرتەڭ، 20 مامىر كۇنى وتەتىن «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ كەزەكتەن تىس سەزىنىڭ كۇن ءتارتىبى تۋرالى باياندالدى.
كەزدەسۋدە «ارداگەرلەر ۇيىمىن» دامىتۋ تۋرالى بىرنەشە ۇسىنىسقا پرەزيدەنت قولداۋ ءبىلدىرىپ، ءتيىستى مەملەكەتتىك ورگاندارعا تاپسىرما بەرەتىنىن ايتتى.