بۇل سوت كونستيتۋسيانىڭ ۇستەمدىگىن قامتاماسىز ەتەتىن ورگان بولادى.
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كونستيتۋسيالىق سوتى تۋرالى» ق ر كونستيتۋسيالىق زاڭى قابىلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل قۇجات مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋعا باعىتتالعان.
«كونستيتۋسيالىق زاڭ جوباسىنىڭ ماقساتتارى كونستيتۋسيالىق سوتتى قۇرۋ بولىگىندە كونستيتۋسياعا ەنگىزىلگەن وزگەرتۋلەردى ىسكە اسىرۋ، مەملەكەتتىڭ قۇقىق قورعاۋ ينستيتۋتتارىن كۇشەيتۋ، نەگىزگى زاڭ ەرەجەلەرىنىڭ قاتاڭ ساقتالۋىن قامتاماسىز ەتۋ. كونستيتۋسيالىق زاڭ جوباسى 3 بولىمنەن، 10 تاراۋدان جانە 67 باپتان تۇرادى. مازمۇنى بويىنشا جوبانى ەكى بولىمگە بولۋگە بولادى. ءبىرىنشىسى – ول كونستيتۋسيالىق سوتتىڭ جانە ونىڭ سۋديالارىنىڭ مارتەبەسى، ولاردىڭ كەپىلدىكتەرمەن قامتاماسىز ەتىلۋى. ال ەكىنشى ءبولىم كونستيتۋسيالىق ءىس جۇرگىزۋ تارتىبىنە ارنالعان»، - دەدى ق ر ادىلەت ءمينيسترى قانات مۋسين.
كونستيتۋسيالىق سوت ەلىمىزدىڭ بۇكىل اۋماعىندا كونستيتۋسيانىڭ ۇستەمدىگىن قامتاماسىز ەتەتىن ورگان بولادى جانە بيلىكتىڭ سوت تارماعىنا جاتپايدى، ويتكەنى بۇل ماسەلە كونستيتۋسيادا تۇپكىلىكتى شەشىلدى. زاڭ جوباسىندا كونستيتۋسيالىق سوت سۋديالارىن تاعايىنداۋ جانە ولاردىڭ وكىلەتتىكتەرىن توقتاتۋ تارتىبىنە بايلانىستى ماسەلەلەر ەگجەي-تەگجەيلى رەگلامەنتتەلگەن.
«اتاپ ايتقاندا، ولاردىڭ تاۋەلسىزدىگى مەن كەپىلدىكتەرى دە بەكىتىلگەن. كونستيتۋسيالىق سوتتىڭ قۇزىرەتتەرى كونستيتۋسيانىڭ 72-بابىمەن تىكەلەي رەتتەلگەن. ماسەلەن، ولارعا سايلاۋدى وتكىزۋدىڭ دۇرىستىعى ماسەلەلەرىن قاراۋ، پارلامەنت قابىلداعان زاڭدار مەن حالىقارالىق شارتتاردىڭ رەسپۋبليكا كونستيتۋسياسىنا سايكەستىگىن قاراۋ، سونداي-اق كونستيتۋسيا نورمالارىنا رەسمي تۇسىندىرمە بەرۋ قۇزىرەتى جاتقىزىلعان. كونستيتۋسياعا ەنگىزىلگەن وزگەرىستەرگە سايكەس، كونستيتۋسيالىق سوت ازاماتتاردىڭ وتىنىشتەرى بويىنشا ولاردىڭ قۇقىقتارى مەن بوستاندىقتارىنا تىكەلەي قاتىستى نورماتيۆتىك قۇقىقتىق اكتىلەردى كونستيتۋسياعا سايكەستىگىن قارايتىن بولادى. سونداي-اق، كونستيتۋسيالىق سوتقا جۇگىنۋ قۇقىعى باس پروكۋرور مەن ادام قۇقىقتارى جونىندەگى ۋاكىلگە بەرىلدى»، - دەدى مينيستر.
قۇجاتتىڭ ەكىنشى بولىمىندە كونستيتۋسيالىق ءىس جۇرگىزۋدىڭ جالپى شارتتارى مەن قاعيداتتارى بەكىتىلدى. كونستيتۋسيالىق سوتقا جولداناتىن وتىنىشتەردىڭ تۇرلەرى، ولاردىڭ نىسانى مەن مازمۇنى ايقىندالدى.
كونستيتۋسيالىق سوتتىڭ وتىنىشتەردى قاراۋ ءتارتىبى بەس كەزەڭنەن تۇراتىن بولادى:
كونستيتۋسيالىق سوت اپپاراتىمەن وتىنىشتەردى الدىن الا قاراۋ؛
كونستيتۋسيالىق ءىس جۇرگىزۋگە ءوتىنىشتى قابىلداۋ؛
وتىرىسقا دايىندىق كەزەڭى؛
ءوتىنىشتى قاراۋ بويىنشا وتىرىس وتكىزۋ؛
سوڭعى كەزەڭ – ءوتىنىش بويىنشا تۇپكىلىكتى شەشىم قابىلداۋ.