پرەزيدەنت قاسىم-جومارت توقايەۆتىڭ رەفەرەندۋمعا قاتىستى بەينەۇندەۋى باستالدى.
مەملەكەت باسشىسى قاسىم-جومارت توقايەۆ الداعى رەفەرەندۋمعا قاتىستى ويىن ءبىلدىردى. ول ەلىمىزدىڭ وتە ماڭىزدى ءارى بەتبۇرىستى كەزەڭگە قادام باسقالى تۇرعانىن ايتتى، دەپ حابارلايدى Almaty-akshamy.kz.
"5 ماۋسىم كۇنى ازاماتتارىمىز جالپىۇلتتىق رەفەرەندۋمدا داۋىس بەرەدى. كونستيتۋسياعا تۇزەتۋلەر ەنگىزۋ ماسەلەسى بويىنشا شەشىم قابىلدايدى. بۇل – مەملەكەتتىڭ جانە بۇكىل قوعامنىڭ بولاشاعىن ايقىندايتىن جاۋاپتى ءسات. ەل تاعدىرى ەشكىمدى بەيجاي قالدىرمايتىنى انىق. ءبىز ءقازىر بارلىق سالانى جاڭعىرتۋعا كىرىستىك"، - دەدى ق ر پرەزيدەنتى قاسىم-جومارت توقايەۆ.
پرەزيدەنت وسى جولدا مەملەكەتتى باسقارۋ ۇلگىسىن تۇبەگەيلى وزگەرتۋ قاجەتتىگى تۋىنداعانىن ايتتى. سول سەبەپتى، مەملەكەت باسشىسى ناۋرىز ايىنداعى جولداۋىندا ساياسي جاڭعىرۋدىڭ اۋقىمدى باعدارلاماسىن ۇسىندى.
"ونىڭ باستى ماقساتى – ەلىمىزدى ودان ءارى دەموكراتيالاندىرۋ، حالىقتىڭ مەملەكەتتى باسقارۋ ىسىنە قاتىسۋ مۇمكىندىگىن كەڭەيتۋ. سونداي-اق، ۇكىمەتتىڭ تيىمدىلىگىن ارتتىرۋ. بۇل وزگەرىستى تولىق جۇزەگە اسىرساق، ىقپالدى پارلامەنتى بار پرەزيدەنتتىك رەسپۋبليكا ۇلگىسىنە ءبىرجولا كوشەمىز. كونستيتۋسيالىق رەفورما ادام قۇقىقتارى مەن بوستاندىقتارىن قورعاۋ جۇيەسىن بارىنشا كۇشەيتەدى. سونىمەن بىرگە ەلىمىزدەگى ساياسي باسەكەنىڭ ءادىل جانە اشىق بولۋىن قامتاماسىز ەتەدى. ءبىز اتا زاڭىمىزدىڭ وتىزدان استام بابىنا وزگەرىس ەنگىزگەلى وتىرمىز. ونىڭ ءبارى ازاماتتارىمىزدىڭ مۇددەسىنە تولىق ساي كەلەدى. وسىلايشا، مەملەكەتىمىزدى تۇبەگەيلى جاڭعىرتامىز. سول ارقىلى ەكىنشى رەسپۋبليكانىڭ نەگىزىن قالايمىز"، - دەدى مەملەكەت باسشىسى.