قازاقستان ورتا ازيا ەلدەرىنىڭ ىشىندە ەڭ ارزان بايلانىس پەن جىلدام ينتەرنەتكە يە

ەڭ قولجەتىمدى ءموبيلدى بايلانىس.

International Telecommunication Union (ITU) مالىمەتتەرىنە سايكەس، ورتالىق ازيانىڭ باسقا ەلدەرىمەن سالىستىرعاندا، ەڭ قولجەتىمدى ءموبيلدى بايلانىس قازاقستاندا كورىنەدى، دەپ حابارلايدى Almaty-akshamy.kz Finprom.kz سىلتەمە جاساپ.

ماسەلەن، 2021 جىلى قازاقستانداعى تاريف بويىنشا ۇيالى بايلانىس شىعىندارى جان باسىنا شاققانداعى جالپى ۇلتتىق تابىستىڭ 1،04%-ىن قۇرادى. قىرعىزستاندا بۇل كورسەتكىش 3،11%-دى قۇراعان.

قازاقستانداعىداي ۇيالى بايلانىس شىعىندارىنىڭ دەڭگەيى وزبەكستاندا (جان باسىنا شاققانداعى جالپى ۇلتتىق تابىستىڭ 1،14%-ى) مەن تۇرىكمەنستاندا (1،17%) تىركەلگەن. ءبىراق تا، بۇل ەلدەردە ءموبيلدى ينتەرنەتتىڭ جىلدامدىعى قازاقستانعا قاراعاندا الدەقايدا تومەن.

رەسۋرستىڭ حابارلاۋىنشا، ەلىمىزدە مۇنداي ءتاريفتىڭ قۇنى ايىنا 2021 جىلى ورتاشا ەسەپپەن 6،89 دوللاردى قۇرادى (2،9 مىڭ تەڭگە). بۇل ەل ازاماتتارىنىڭ شىعىندارىنىڭ 4،4%-ىن عانا الادى. بۇدان بولەك "ريا نوۆوستي" دەرەكتەرىنە سايكەس، ەلىمىزدەگى ءۇي شارۋاشىلىقتارى شىعىندارىنىڭ 53%-ى تاماققا كەتەدى.

دۇنيەجۇزىلىك بانكتىڭ دەرەگىنشە، 2021 جىلى ەلىمىزدەگى جان باسىنا شاققانداعى جالپىۇلتتىق تابىس 8720 دوللاردى قۇرادى.

جالپى الەم بويىنشا بۇل كورسەتكىش 12070 دوللاردى قۇرادى.

قازاقستاندا ءموبيلدى ينتەرنەتتىڭ ورتاشا جىلدامدىعى وسى جىلدىڭ قازان ايىندا 22،41 مبيت/س-قا دەيىن ارتتى.

جالپى الەم بويىنشا ءموبيلدى ينتەرنەتتىڭ ورتاشا جىلدامدىعى ءبىر جىل ىشىندە 28،54 مبيت/س-تان 33،43 مبيت/س-قا دەيىن ءوستى.