اۆياسيا قاۋىپسىزدىگى: تىيىم سالىنعان زاتتار ءتىزىمى

الەمدىك اۆياسيالىق تاجىريبەدەن الىنعان جاعدايلارعا نەگىزدەلگەن قاۋىپسىزدىك ستاندارتى. 

استانا اۋەجايىنىڭ اۆياسيالىق قاۋىپسىزدىك قىزمەتىنىڭ ينسپەكتورلارى جىلدىڭ باسىنان باستاپ جولاۋشىلاردى تەكسەرۋ پۋنكتەرىندە 6 مىڭعا جۋىق تىيىم سالىنعان زات تاپقان، دەپ حابارلايدى Almaty-akshamy.kz قازاقپاراتقا سىلتەمە جاساپ.

«نۇرسۇلتان نازاربايەۆ حالىقارالىق اۋەجايى» اق باسپا ءسوز قىزمەتى قازاقستاندىقتارعا قول جۇگىندە قانداي زاتتاردى الىپ جۇرۋگە بولمايتىنى تۋرالى جانە ۇشاقتىڭ بورتىنا نەگە شاشقا ارنالعان لاك، گەل جانە قىرىنۋعا ارنالعان كوبىك سىندى ءقاۋىپتى ەمەس زاتتاردى الىپ كىرۋگە جول بەرىلمەيتىنىن ايتىپ بەردى.

جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا سىيىمدىلىعى 100 مل-دەن اساتىن كونتەينەرلەردەگى كەز كەلگەن سۇيىقتىقتى (سۋ، سۋسىندار، قىرىنۋعا ارنالعان كوبىك جانە ت.ب.)، اسىرەسە، بەلگىسىز قۇرامداعى زاتتار مەن سۇيىقتىقتاردى (زاۋىتتىق قاپتاماسىز، تەحنيكالىق پاسپورتسىز جانە سەرتيفيكاتسىز) قول جۇگىمەن تاسىمالداۋعا تىيىم سالىنادى.

ايتا كەتكەن ءجون، بۇل - استانالىق اۋەجايدىڭ ويلاپ تاپقان ەرەجەسى ەمەس، الەمدىك اۆياسيالىق تاجىريبەدەن الىنعان جاعدايلارعا نەگىزدەلگەن قاۋىپسىزدىك ستاندارتى.

«اۆياسيا تاريحىندا لاڭكەستەردىڭ قاراپايىم پىشاق نەمەسە ۇستارانىڭ كومەگىمەن اۋە كەمەلەرىن كەپىلگە الۋ، ۇرلاۋ نەمەسە جويۋ جاعدايلارى ورىن العان. كەيبىر شابۋىلدار، ءتىپتى، سۇيىق جارىلعىش زاتتاردىڭ كومەگىمەن دە جۇزەگە اسىرىلعان. سوندىقتان جولاۋشىلار اتالعان ەرەجەلەرگە تۇسىنىستىك تانىتادى دەگەن سەنىمدەمىز»، ­­- دەپ اتاپ ءوتتى اۋە ايلاعىن تەكسەرۋ قىزمەتىنىڭ باسشىسى عابيت سۇلەيەۆ.

ايتا كەتەرلىگى، بەلگىلى ءبىر زاتتار ادامنىڭ كىناسىنەن ەمەس، ماتەريالداردىڭ فيزيكا-حيميالىق قاسيەتتەرىنە بايلانىستى ءقاۋىپ ءتوندىرۋى مۇمكىن. ماسەلەن، جوعارى بيىكتىكتە قىسىمنىڭ تومەندەۋىنە بايلانىستى گازى بار سۇيىقتىقتارمەن تولتىرىلعان كونتەينەرلەر جارىلۋى مۇمكىن.

ەگەر دارىگەردىڭ نۇسقاۋلىعى بولسا، دارى-دارمەكتى، بالالار تاعامىن جانە ارنايى ديەتالىق قاجەتتىلىكتەردى قول جۇگىندە تاسىمالداۋعا بولادى. الايدا، ۇشۋ كەزىندە قاجەت مولشەردە عانا الۋ كەرەك.

قول جۇگىمەن تاسىمالداۋعا رۇقسات ەتىلمەگەن كەيبىر زاتتاردى تىركەۋدەن وتكەن باگاجدا الىپ جۇرۋگە بولادى. اتاپ ايتقاندا، 100 مل-دەن استام سۇيىقتىقتار، اەروزولدەر جانە گەلدەر (سۋ، سۋسىندار، سۋسابىندار، قىرىنۋ كوبىكتەرى جانە باسقا)، سونداي-اق جۇمىس قۇرالدارى.

ەگەر ورىن الدىن الا بروندالماسا نەمەسە اۆياكومپانيادان ۇشۋعا قاتىستى راستاۋ الىنباسا، جولاۋشىلارعا ءۇي جانۋارلارىن تاسىمالداۋعا تىيىم سالىنۋى مۇمكىن.

سونىمەن قاتار جانۋارلاردى تاسىمالدايتىن جولاۋشىلاردىڭ قولىندا ۆەتەرينارلىق سەرتيفيكات جانە حالىقارالىق ۆەتەرينارلىق پاسپورت بولۋى شارت.

اۋەجاي وكىلدەرى سونىمەن قاتار «جولاۋشىلاردان تاركىلەنگەن زاتتار قايدا كەتەدى جانە ولاردى قايتارىپ الۋعا بولا ما؟» دەگەن كوپشىلىكتى تولعاندىراتىن سۇراقتارعا جاۋاپ بەرەدى.

اتالعان جاعداي ورىن السا، جولاۋشىلاردىڭ نازارىنا بىرنەشە نۇسقا ۇسىنىلادى: زاتتاردى شىعارىپ سالۋشى ادامعا بەرۋ؛ ەگەر رۇقسات ەتىلسە، زاتتاردى باگاجعا تاپسىرۋ؛ 30 تاۋلىك مەرزىمگە ساقتاۋعا بەرۋ حاتتاماسىن تولتىرۋ.

ەگەر ءبىر دە ءبىر نۇسقا جولاۋشىنىڭ تالابىنا سايكەس كەلمەسە، جولاۋشىلارعا ارنايى قىزمەت كورسەتەتىن كومپانيا زاتتى كادەگە جاراتۋ تۋرالى شارت جاساسۋدى ۇسىنادى.

وسى ورايدا ەلوردالىق اۋەجايدىڭ اۋە قاۋىپسىزدىگى قىزمەتى باگاجدى جيناۋ بارىسىندا جولاۋشىلارعا بارىنشا جاۋاپكەرشىلىك تانىتىپ، قول جۇگى مەن باگاج تاسىمالداۋدا تىيىم سالىنعان زاتتاردىڭ تىزىمىمەن الدىن الا تانىسۋعا كەڭەس بەرەدى.

اتاپ ايتقاندا:

- جارىلعىش قۇرىلعىلار مەن زاتتار؛

- تەز تۇتاناتىن سۇيىقتىقتار مەن زاتتار، ونىڭ ىشىندە اسەتون، قۇرامىندا 70%-تەن استام الكوگولى بار سۋسىندار؛

- تۇتانعىش قاتتى زاتتار؛

– اتىس قارۋىنىڭ بارلىق ءتۇرى، سيگنالدىق زىمىران تاسىعىشتار، تاپانشالار، شوك جانە ەلەكترمەن زاقىمداۋ قۇرىلعىلارى، روگاتكالار، سونداي-اق ولارعا ۇقساس بارلىق كوشىرمە مەن زاتتار، ونىڭ ىشىندە ويىنشىقتار تۇرىندەگى؛

– اتىس جانە گاز قارۋىنا ارنالعان وق-دارىلەر، ونىڭ ىشىندە جاۋىنگەرلىك، جارىق-دىبىستىق، تراۆماتيكالىق ارەكەتتى پاتروندار؛

- پىشاق، ۇشكىر زاتتار، سونداي-اق ولارعا ۇقساس زاتتار؛

- سۇيىتىلعان گازدار، ونىڭ ىشىندە تۇرمىستىق پايدالانۋعا ارنالعان گازدار، اەروزولدەردىڭ بارلىق ءتۇرى؛

- راديواكتيۆتى جانە ەسىرتكى زاتتارى؛

- ۋلى زاتتار، جۇقپالى نەمەسە بيولوگيالىق ءقاۋىپتى ماتەريالدار.