كوميتەت ءتيىستى شارالاردى قابىلدايدى.
قازاقستاندا ۇستازداردىڭ قۇقىعىن قورعاۋ ماقساتىندا ارنايى Telegram چاتى ىسكە قوسىلدى، دەپ حابارلايدى Almaty-akshamy.kz.
«وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتى «پەداگوگتى قورعاۋ» (https://t.me/KOKSO_MP) Telegram چاتىن ىسكە قوستى. ءقازىردىڭ وزىندە چاتقا 2 مىڭنان استام ادام قوسىلدى»، - دەلىنگەن وقۋ-اعارتۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
بۇل چاتتا مۇعالىمدەر ءوز قۇقىقتارىنىڭ بۇزىلعانى تۋرالى حابارلاي الادى. مىسالى، مىندەتتەن تىس فۋنكسيالارعا تارتۋ، شامادان تىس ەسەپ بەرۋ جانە ت.ب. تۋرالى. تەلەگرامداعى چاتقا كەلگەن بارلىق اقپارات تەكسەرىلىپ، ءبىلىم سالاسىندا ساپانى قامتاماسىز ەتۋ كوميتەتىنىڭ جانە اۋماقتىق دەپارتامەنتتەردىڭ ماماندارى وتىنىشتەرگە جەدەل تۇردە جاۋاپ بەرىپ، مۇعالىمدەرمەن بايلانىسادى.
«مەملەكەت باسشىسىنىڭ تاپسىرماسى بويىنشا مۇعالىمدەردىڭ قۇقىقتارى مەن مۇددەلەرىن قورعاۋدى كوزدەيتىن «پەداگوگ مارتەبەسى تۋرالى» زاڭ قابىلدانعان بولاتىن. مۇعالىمدەر شامادان تىس ەسەپ بەرۋدەن بوساتىلدى. قازىرگى كۇنى پەداگوگتەر كۇنىنە تەك ەكى قۇجات قانا، ياعني سىنىپ جۋرنالىن مەن قىسقا مەرزىمدى (ساباق) جوسپارىن تولتىرۋى كەرەك. قۇجاتتاردىڭ ناقتى ءتىزىمى بار جانە ونى بارلىعى ساقتاۋى قاجەت. مەكتەپ اكىمشىلىگى مۇعالىمدەردەن باسقا قۇجاتتاردى تولتىرۋدى تالاپ ەتۋگە قۇقىعى جوق. ەگەر مۇعالىمدەردىڭ قۇقىقتارىن بۇزۋ انىقتالسا، وندا كوميتەت ءتيىستى شارالاردى قابىلدايدى. سونىمەن قاتار وڭىرلەردە اۋماقتىق دەپارتامەنتتەر جانىنان پەداگوگيكالىق ادەپ جانە مۇعالىمدەردىڭ قۇقىقتارىن قورعاۋ جونىندەگى كەڭەستەر جۇمىس ىستەيتىنىن ەسكە سالامىز»، - دەدى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ.