قازاقستان مەن جۇڭگو شەكاراسىندا ءۇشىنشى تەمىرجول وتكەلى پايدا بولۋى مۇمكىن

سونداي-اق ەكى ەلدىڭ اۋماعىندا مادەني ورتالىقتار اشۋ ماسەلەسى تالقىلاندى

بۇل تۋرالى قحر-داعى ق ر ەلشىسى شاحرات نۇرىشيەۆ مالىمدەدى، ول اسپان استى ەلى باسشىسىنىڭ رەسپۋبليكامىزعا جاساعان ساپارىنىڭ تاريحي ماڭىزدىلىعىنا باعا بەردى، دەپ حابارلايدى Almaty-akshamy.kz Zakon.kz-عا سىلتەمە جاساپ.

«بۇل – قحر ءتوراعاسىنىڭ قاسىم-جومارت توقايەۆتىڭ پرەزيدەنت بولىپ سايلانعاننان كەيىنگى العاشقى ساپارى. بۇل – قكپ-نىڭ XX بۇكىلقىتايلىق سەزى جانە قر-داعى كەزەكتەن تىس پرەزيدەنتتىك سايلاۋ قارساڭىندا وتكەن ساپار. الداعى ساپارعا دا ايرىقشا نازار اۋدارىلىپ وتىر. كەزدەسۋدە ەلدەر اراسىنداعى 30 جىلدىق قارىم-قاتىناستىڭ قورىتىندىسى شىعارىلىپ، جاڭا كەزەڭدەگى دامۋ باعىتتارى ايقىندالدى»، - دەپ ايتتى شاحرات نۇرىشيەۆ.

سونىمەن قاتار، قازاقستاندىق ديپلومات ەلىمىزدىڭ ترانزيتتىك-كولىكتىك باعىتتارىن ودان ءارى ءارتاراپتاندىرۋعا جانە ينتەگراسيالانعان لوگيستيكالىق شەشىمدەردى ەنگىزۋگە، ونىڭ ىشىندە قازاقستان ارقىلى جاڭا تەمىرجول دالىزدەرىن اشۋعا مۇددەلىلىگىن ءبىلدىردى.

«اتاپ ايتقاندا، ءبىز قازاقستان-قىتاي شەكاراسىندا ءۇشىنشى تەمىر جول وتكەلىن اشۋ ماسەلەسىن بەلسەندى تالقىلاۋدامىز. ءبىز ونى جۇڭگو مەن ەۋروپا اراسىنداعى جۇكتەردىڭ جىلدام قوزعالىسىنا ىقپال ەتەدى دەپ سانايمىز»، - دەدى شاحرات نۇرىشيەۆ.

سونداي-اق ەكى ەلدىڭ اۋماعىندا مادەني ورتالىقتار اشۋ ماسەلەسى تالقىلاندى. ەلشى ونىڭ ەكىجاقتى دوستىقتى نىعايتۋ ءۇشىن گۋمانيتارلىق تۇرعىدان ماڭىزدى ەكەنىن اتاپ ءوتتى.