بۇل ساپاردىڭ ءمانى ەرەكشە.
قازاقستان پرەزيدەنتى قاسىم-جومارت توقايەۆ باۋىرلاس قىرعىز رەسپۋبليكاسىنا رەسمي ساپارمەن كەلۋگە شاقىرعانى ءۇشىن سادىر جاپاروۆقا ريزاشىلىعىن ءبىلدىردى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«مەن ءسىزدىڭ شاقىرۋىڭىزدى زور ريزاشىلىقپەن قابىل الدىم. بۇل ساپاردىڭ ءمانى ەرەكشە. وسى ماڭىزدى ساپار ەلدەرىمىزدىڭ اراسىنداعى ىنتىماقتاستىقتىڭ ودان ءارى دامۋىنا زور سەرپىن بەرەتىنى ءسوزسىز. سونىڭ ارقاسىندا ستراتەگيالىق سەرىكتەستىگىمىز دە نىعايا تۇسپەك. قىرعىزستان – قازاقستانعا بارلىق جاعىنان ەڭ جاقىن ەل. ونى كۇمانسىز ايتۋعا بولادى. بيىل ەكى ەلدىڭ ديپلوماتيالىق قاتىناس ورناتقانىنا 30 جىل تولىپ وتىر. وسى كەزەڭدە ىنتىماقتاستىق اياسى بارىنشا كەڭەيىپ، دوستىعىمىز نىعايا ءتۇستى. ءبىز بارلىق دەڭگەيدە ءوزارا سەنىمگە نەگىزدەلگەن ساياسي ديالوگ ورناتتىق. مەملەكەتارالىق، پارلامەنتارالىق جانە ۇكىمەتارالىق كەڭەستەرىمىز بار. سونداي-اق، سىرتقى ىستەر مينيسترلىكتەرى ىقپالداسا جۇمىس اتقارۋدا. قازاقستان تەك قىرعىز ەلىمەن وسىنداي تىعىز بايلانىس ورناتقانىن ەرەكشە اتاپ وتكىم كەلەدى»، – دەدى قاسىم-جومارت توقايەۆ.
سادىر جاپاروۆ ءوزىنىڭ شاقىرۋىن قابىل الىپ، قىرعىزستانعا رەسمي ساپارمەن كەلگەنى ءۇشىن قاسىم-جومارت توقايەۆقا العىس ايتىپ، قازاقستان پرەزيدەنتىنىڭ بۇل ساپارى ەكى ەل اراسىنداعى ىنتىماقتاستىققا تىڭ سەرپىن بەرەتىنىن اتاپ ءوتتى.
«ءبىز – ىنتىماقتاستىعى جاراسقان باۋىرلاس ەلدەرمىز. ەكى ەل اراسىندا، ءتىپتى وڭىرلەرىمىزدىڭ دەڭگەيىندە دە ەشقانداي تۇسىنبەستىك بولعان ەمەس. تولىقتاي دوستىق رۋحتا بىرگە دامىپ كەلەمىز»، – دەدى قىرعىزستان پرەزيدەنتى.
مەملەكەتتەر باسشىلارى بۇدان كەيىن ساياسي، ساۋدا-ەكونوميكالىق جانە مادەني-گۋمانيتارلىق سالالاردى كەڭەيتۋگە ەرەكشە كوڭىل بولە وتىرىپ، قازاق-قىرعىز ستراتەگيالىق سەرىكتەستىگىنىڭ اۋقىمدى ماسەلەلەرىن تالقىلادى. سونىمەن قاتار ايماقتىق كۇن تارتىبىندەگى پروبلەمالار قاراستىرىلدى.
بۇعان دەيىن حابارلاعانىمىزداي، قاسىم-جومارت توقايەۆ رەسمي ساپارمەن قىرعىزستانعا باردى.
قىرعىزستان پرەزيدەنتى «اق كەمە» ءمارمار شاتىرىندا قاسىم-جومارت توقايەۆتى رەسمي قارسى الدى.