ەلىمىزدىڭ تۋريزم جانە سپورت مينيسترلىگى مەن وزبەكستاننىڭ تۋريزم كوميتەتى وسى ماقساتتا ارنايى «جول كارتاسىن» جاسادى.
ماقسات - تۇركى مەملەكەتتەرى اراسىنداعى تىعىز دوستىق قارىم-قاتىناستى نىعايتۋ مەن تۋريستەر اعىنىن ۇلعايتۋ. قۇجاتقا ساي، ەكى مەملەكەت اراسىندا ساياحاتشىلار قاتارىن ارتتىرۋعا باعىتتالعان باعدارلاما ازىرلەنەدى، دەپ حابارلايدى Almaty-akshamy.kz.
تۋريستىك كومپانيالاردىڭ ءوزارا اقپارات الماسۋىن جولعا قويۋ، بىرلەسكەن جوبالاردى ىسكە اسىرۋ جوسپارلانعان. زيارات ءتۋريزمىن دامىتۋ ماقساتىندا شەكاراداعى وتكىزۋ بەكەتتەرىندە كەلۋشىلەر ءۇشىن قولايلى جاعداي جاساۋ كوزدەلگەن. قازاقستان مەن وزبەكستان اراسىندا اۆتوبۋس رەيستەرىنىڭ سانىن ۇلعايتۋ دا جوسپاردا بار.
«بۇقارا وڭىرىندە جەتى ءپىر بار، وسى عۇلامالاردىڭ ءومىرى جايلى كىتاپتار بىرنەشە تىلگە اۋدارىلدى، ونىڭ ىشىندە قازاق تىلىندە دە جارىق كورگەن. كيەلى مەكەندى ارالاپ، كوزبەن كورۋگە قازاقستاندىقتاردىڭ قىزىعۋشىلىعى ەرەكشە. باۋىرلاس ەكى ەلدىڭ زيارات ءتۋريزمىن بىرلەسە دامىتۋدى قولعا العانى اسا قۇپتارلىق ءىس»، - دەيدى تاريحشى-عالىم كوميلجون راحيموۆ.