كولىك ءمينيسترى مارات قارابايەۆ لاتۆيالىق ارىپتەسى كاسپارس بريشكەنسپەن كەزدەستى.
كەزدەسۋ بارىسىندا تاراپتار قازاقستان مەن لاتۆياداعى كولىك سالاسىنىڭ قازىرگى جاعدايى مەن دامۋ پەرسپەكتيۆالارى تۋرالى پىكىر الماسىپ، ترانسكاسپيي حالىقارالىق كولىك باعىتىن دامىتۋ تۋرالى مەموراندۋمعا قول قويدى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
«بۇگىنگى تاڭدا قازاقستان مەن لاتۆيا كولىك-ترانزيتتىك ىنتىماقتاستىقتى بەلسەندى دامىتىپ جاتىر. ىنتىماقتاستىقتىڭ ماڭىزدى اسپەكتىلەرىنىڭ ءبىرى – كولىك ماسەلەلەرى بويىنشا تۇراقتى نەگىزدە جۇمىس ىستەيتىن بىرلەسكەن جۇمىس توبى. اتالعان توپ جۇمىس بارىسىندا تەمىرجول، اۆتوموبيل، اۋە كولىگى، ترانزيت جانە لوگيستيكا سالاسىنداعى كوپتەگەن ماڭىزدى سۇراقتى قامتيدى»، – دەپ اتاپ ءوتتى مينيسترلىك باسشىسى.
ءمينيستردىڭ ايتۋىنشا، بۇگىندە ترانسكاسپيي حالىقارالىق كولىك باعىتىنىڭ اتقارىپ وتىرعان ءرولى ەرەكشە. وتكەن جىلدىڭ قورىتىندىسى بويىنشا جۇكتەردى تاسىمالداۋ كولەمىنىڭ ەكى ەسە ارتۋى وسىنىڭ بىردەن-بىر دالەلى.
«ترانسكاسپيي حالىقارالىق كولىك باعىتىنىڭ الەۋەتىن ارتتىرۋ ماقساتىندا ينفراقۇرىلىمدى جانە تەرمينالدىق قۋاتتاردى جاقسارتۋ، پورت قۋاتتارىن كەڭەيتۋ، جىلجىمالى قۇرامدى ۇلعايتۋ، اكىمشىلىك كەدەرگىلەردى الىپ تاستاۋ جانە تاسىمالداۋشىلار ءۇشىن قولايلى جاعدايلار جاساۋ بويىنشا جۇمىستار جۇرگىزىلىپ جاتىر. بۇل 2025 جىلعا قاراي حالىقارالىق كولىك باعىتىنىڭ وتكىزۋ قابىلەتىن جىلىنا 10 ملن تونناعا دەيىن ۇلعايتۋعا مۇمكىندىك بەرەدى»، – دەدى سالالىق مينيسترلىكتىڭ باسشىسى.
ايتا كەتەرلىگى، بۇگىنگى تاڭدا لاتۆيا اۆستريا، گەرمانيا، ليتۆا، ەستونيا جانە ۆەنگريامەن بىرگە تمتم-گە كىرۋگە قىزىعۋشىلىق تانىتىپ وتىر. وسى رەتتە حالىقارالىق كولىك باعىتىنىڭ حالىقارالىق قاۋىمداستىعى شەڭبەرىندە ازەربايجان، گرۋزيا جانە تۇركيامەن 2027 جىلعا دەيىنگى جول كارتاسىنا قول قويىلدى. رەسمي ساپار اياسىندا وسى جىلدىڭ 31 قاڭتارىندا رۋمىنيامەن دە مەموراندۋمعا قول قويىلعان بولاتىن.
ءسوز كەزەگىندە بەيىندى مينيسترلىكتىڭ باسشىسى لاتۆيالىق ينۆەستورلاردى ينفراقۇرىلىمدىق جوبالاردى بىرلەسىپ ىسكە اسىرۋعا شاقىردى.
«ءبىز ترانزيتتىك جۇك اعىندارىنىڭ كولەمىن ءوزارا ۇلعايتۋ، كولىك مارشرۋتتارىن بەلگىلەۋ جانە دامىتۋ، مۋلتيمودالدى تاسىمالداۋ جانە لوگيستيكالىق پروسەستەر سالاسىنداعى وزىق تاجىريبەلەرمەن الماسۋ ءۇشىن كولىك جانە لوگيستيكا سالاسىنداعى ىنتىماقتاستىقتى نىعايتۋعا دايىنبىز»، – دەپ تۇيىندەدى م.قارابايەۆ.
ساپار اياسىندا قازاقستاندىق دەلەگاسيا سالىنىپ جاتقان Rail Baltica وبەكتىسىنە مەن ريگا پورتىنا باردى. سونىمەن بىرگە جۇمىس ساپارى اياسىندا مارات قارابايەۆ قازاقستان-لاتۆيا بيزنەس-فورۋمىندا كولىك سالاسىنداعى ىنتىماقتاستىق تۋرالى بايانداما جاساپ، ريگا پورتى باسقارماسىنىڭ باسشىلىعىمەن جانە جەرگىلىكتى بيزنەس وكىلدەرىمەن ەكىجاقتى كەزدەسۋلەر وتكىزدى.