بىتىمگەرلەردى دايارلاۋ، اسكەري-دالالىق مەديسينا جانە رحب قورعاۋ سالاسىنداعى ءوزارا ءىس-قيمىل اسپەكتىلەرى دە تالقىلاندى
قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال-مايور تالعات قويباقوۆ پەن جاپونيانىڭ ءوزىن-وزى قورعاۋ كۇشتەرى قۇرلىق اسكەرلەرى شتابىنىڭ باستىعى گەنەرال يوشيدا يوشيحيدي اراسىنداعى كەلىسسوزدەر بەينەكونفەرەنس بايلانىس تۇرىندە ءوتتى، دەپ حابارلايدى Almaty-akshamy.kz.
تاراپتار ءبىر-بىرىن قازاقستان مەن جاپونيا اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىمەن قۇتتىقتاپ، اسكەري ىنتىماقتاستىقتىڭ قازىرگى احۋالى مەن كەلەشەكتە دامۋ ماسەلەسىن تالقىلادى.
گەنەرال-مايور تالعات قويباقوۆ پەن گەنەرال يوشيدا يوشيحيدي اسكەري ءبىلىم مەن عىلىم جەلىسى بويىنشا ىنتىماقتاستىقتى دامىتۋعا قىزىعۋشىلىق ءبىلدىردى. كەلىسسوزدەر بارىسىندا سونداي-اق، بىتىمگەرلەردى دايارلاۋ، اسكەري-دالالىق مەديسينا جانە رحب قورعاۋ سالاسىنداعى ءوزارا ءىس-قيمىل اسپەكتىلەرى دە تالقىلاندى.