ولجاس بەكتەنوۆ Fufeng Group باسشىسى لي سيۋەچۋنمەن اۋىل شارۋاشىلىعى ونىمدەرىن تەرەڭ وڭدەۋ جوباسىن تالقىلادى
قازاقستان پرەمەر-مينيسترى ولجاس بەكتەنوۆ قىتايدىڭ Fufeng Group كومپانياسىنىڭ باسقارما ءتوراعاسى لي سيۋەچۋنمەن اگروونەركاسىپ جانە كومىر حيمياسى سالاسىنداعى ىنتىماقتاستىقتى تالقىلادى. كەزدەسۋدە تەرەڭ وڭدەۋگە جانە ۇزاقمەرزىمدى ينۆەستيسيالىق سەرىكتەستىككە ەرەكشە نازار اۋدارىلدى.
Fufeng Group Company Limited – امينقىشقىلدارى مەن ولاردىڭ تۋىندىلارىن وندىرۋگە، سونداي-اق وسى سالاداعى زەرتتەۋلەر مەن ازىرلەمەلەرگە ماماندانعان بيو-فەرمەنتتەۋ يندۋسترياسىنداعى الەمدىك كوشباسشى. كومپانيا ناتريي گلۋتاماتى مەن كسانتان شايىرىنىڭ الەمدەگى ەڭ ءىرى وندىرۋشىلەرىنىڭ ءبىرى سانالادى.
كەزدەسۋ بارىسىندا Fufeng Group-تىڭ قازاقستاندا كراحمالدى قانت پەن امينقىشقىلدارىن ءوندىرۋ زاۋىتتارىن، كومىر جىلۋ ەلەكتر ستانساسى مەن اعىندى سۋلاردى تازارتۋ ستانساسىن قامتيتىن جۇگەرىنى تەرەڭ وڭدەۋگە ارنالعان وندىرىستىك پارك قۇرۋ تۋرالى ۇسىنىسى تالقىلاندى.
بيداي مەن جۇگەرىنى تەرەڭ وڭدەۋ قوسىلعان قۇنى جوعارى ونىمدەر – كراحمال، امينقىشقىلدارى، ناتريي گلۋتاماتى جانە كسانتان شايىرىنىڭ ءوندىرىسىن قامتاماسىز ەتەدى. بۇل ونىمدەر شيكىزات باعاسىنان 10-15 ەسە جوعارى تۇرادى. جوبا اياسىندا 1 مىڭ جاڭا جۇمىس ورنى اشىلماق، ال ينۆەستيسيا كولەمى شامامەن $300-350 ملن-دى قۇرايدى.
لي سيۋەچۋن كومپانيانىڭ اۋىل شارۋاشىلىعى داقىلدارىن ءوسىرۋ، ساپالى تىڭايتقىشتارمەن قامتاماسىز ەتۋ جانە قازاقستاندىق ماماندارمەن زاماناۋي اگروتەحنولوگيالار بويىنشا تاجىريبە الماسۋعا دايىن ەكەندىگىن ايتتى. سونداي-اق ول كومىر-حيميا سالاسىنداعى ىنتىماقتاستىققا قىزىعۋشىلىق ءبىلدىردى.
قازاقستان پرەمەر-مينيسترى مەملەكەت باسشىسىنىڭ ەكونوميكانى وسىرۋگە ارنالعان ماقساتتارى اياسىندا اگروونەركاسىپ كەشەنىنە ينۆەستيسيا قۇيۋدىڭ ماڭىزدىلىعىن اتاپ ءوتتى.
«قازاقستان قوسىلعان قۇنى جوعارى ونىمدەر ءوندىرىسىن دامىتۋعا ۇمتىلۋدا، ال استىقتى تەرەڭ وڭدەۋ كەشەندەرىن سالۋ – ءبىزدىڭ باسىم باعىتتارىمىزدىڭ ءبىرى. بۇل ەكونوميكانى ءارتاراپتاندىرۋعا جانە ەكسپورت مۇمكىندىكتەرىن كەڭەيتۋگە مۇمكىندىك بەرەدى. بىزدە ينفراقۇرىلىم، شيكىزات جانە مەملەكەتتىك قولداۋ بار. جوبا اگروونەركاسىپ سەكتورىندا قوسىمشا قۇن قۇرۋدىڭ جانە وزىق تەحنولوگيالار ەنگىزۋدىڭ جارقىن ۇلگىسى بولادى. ۇكىمەت تاراپىنان قاجەتتى قولداۋ كورسەتىلەدى»، — دەدى ولجاس بەكتەنوۆ.
قازاقستان نارىعىندا Fufeng Group سياقتى ءىرى ويىنشىنىڭ كەلۋى اۋىل شارۋاشىلىعى داقىلدارىن، اسىرەسە سولتۇستىك ايماقتاردا استىق ەگۋدى ءارتاراپتاندىرۋعا ىقپال ەتەدى. كومپانيانىڭ قازاقستاندىق فەرمەرلەرمەن جوسپارلى وففتەيك-كەلىسىمشارتتار جاساۋى ءتيىمدى ىنتىماقتاستىقتى قامتاماسىز ەتەدى.
كەزدەسۋ قورىتىندىسىندا پرەمەر-مينيستر اۋىل شارۋاشىلىعى، ونەركاسىپ جانە قۇرىلىس مينيسترلىكتەرىنە Fufeng Group كومپانياسىمەن ينۆەستيسيالىق كەلىسىمدى جەدەلدەتىپ دايىنداۋ جونىندە تاپسىرما بەردى.