تاۋار اينالىمى 51%-عا ءوستى.
قازاقستاننىڭ پرەمەر-مينيسترى ءاليحان سمايىلوۆ «قازاقستان-ەۋرووداق» ديالوگ پلاتفورماسىنىڭ وتىرىسىن وتكىزدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
شاراعا ەۋروپالىق وداقتىڭ قازاقستانداعى وكىلدىگىنىڭ باسشىسى، گەرمانيا، فرانسيا، يسپانيا، ليتۆا، پولشا، بەلگيا، شۆەسيا، سلوۆاكيا، ەستونيا، حورۆاتيا، نيدەرلاند، بولگاريا، چەحيا، لاتۆيا، فينليانديا، يتاليا، اۋستريا، گرەكيا جانە رۋمىنيانىڭ ەلىمىزدەگى ەلشىلەرى، سونداي-اق ورتالىق مەملەكەتتىك ورگاندار مەن ۇلتتىق كومپانيالاردىڭ باسشىلارى قاتىستى.
وتىرىس باسىندا پرەمەر-مينيستر ەۋروپالىق وداق كوپ جىلدار بويى قازاقستاننىڭ نەگىزگى ساياسي، ساۋدا-ەكونوميكالىق جانە ينۆەستيسيالىق سەرىكتەستەرىنىڭ ءبىرى ەكەنىن اتاپ ءوتتى.
ماسەلەن، قازاقستان مەن ەو ەلدەرى اراسىنداعى تاۋار اينالىمى 2022 جىلدىڭ 6 ايىندا $20،1 ملرد قۇرادى. بۇل 2021 جىلدىڭ سايكەس كەزەڭىمەن سالىستىرعاندا 51،2%-عا كوپ. 1-توقساننىڭ قورىتىندىسى بويىنشا جالپى شەتەلدىك ينۆەستيسيالاردىڭ ەلگە كەلۋى 54%-عا ارتىپ، $6،8 ملرد قۇرادى. بۇل ورايدا تاۋ-كەن ءوندىرۋ ونەركاسىبىنە كاپيتال تارتۋ دەڭگەيى 35،7%-عا ءوسىپ، $3،5 ملرد قۇرادى.
«ءبىز ەۋرووداقتىڭ قازاقستاننىڭ تاۋ-كەن ونەركاسىبىنە قىزىعۋشىلىق تانىتىپ وتىرعانىن كورىپ وتىرمىز. وسى سالاداعى ىنتىماقتاستىقتىڭ الەۋەتى زور. وسىعان بايلانىستى ەۋروپالىق وداق ەلدەرىنىڭ گەولوگيالىق قىزمەتتەرىن سيفرلاندىرۋ، گەولوگيا عىلىمىن دامىتۋ جانە سالالىق ينفراقۇرىلىم سالاسىندا سەرىكتەس بولۋعا شاقىرامىز»، - دەدى ءاليحان سمايىلوۆ.
پرەمەر-مينيستر سالانى اۆتوماتتاندىرۋ اياسىندا جەر قويناۋىن پايدالانۋ سالاسىنداعى بارلىق قولدانىستاعى اقپاراتتىق جۇيەلەردى بىرىكتىرۋ جانە ينتەگراسيالاۋ ارقىلى Kaznedra ءبىرىڭعاي پلاتفورماسى قۇرىلاتىنىن اتاپ ءوتتى. بۇل پلاتفورما ينۆەستورلارعا «ءبىر تەرەزە» رەجيمىندە كەشەندى سەرۆيستىك قىزمەت كورسەتۋگە ىقپال ەتەتىن بولادى.
سونىمەن قاتار ۇكىمەت باسشىسى گەولوگيالىق بارلاۋ جۇمىستارىنىڭ ءداستۇرلى تۇرلەرىمەن قاتار، قازاقستاندى گەوفيزيكالىق زەرتتەۋلەردىڭ وزىق ادىستەرى قىزىقتىراتىنىن اتاپ ءوتتى.
«وسى مۇمكىندىكتى پايدالانا وتىرىپ، قازاقستاننىڭ ەۋرووداق ەلدەرىمەن ەكونوميكالىق ىنتىماقتاستىقتى كەڭەيتۋ جانە نىعايتۋ جونىندەگى نيەتىنىڭ ناقتى ەكەنىن تاعى دا راستاعىم كەلەدى»، - دەدى ءاليحان سمايىلوۆ.
وتىرىس بارىسىندا قاتىسۋشىلار پايدالى قازبالاردى ءوندىرۋ، جاڭا تەحنولوگيالاردى قولدانۋ، گەولوگيالىق دەرەكتەردى سيفرلاندىرۋ، ينۆەستيسيالار تارتۋ، ونەركاسىپ قالدىقتارىن قايتا وڭدەۋ جانە قورشاعان ورتانى قورعاۋ ماسەلەلەرىن تالقىلادى.