قازاقستان سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين قازاقستان-برازيليا پارلامەنتارالىق دوستىق توبىنىڭ ءبىرىنشى وتىرىسىنا قاتىسۋ ءۇشىن استاناعا ساپارى اياسىندا برازيليانىڭ فەدەرالدى دەپۋتاتى – «قازاقستان-برازيليا» پارلامەنتارالىق دوستىق توبىنىڭ ءتوراعاسى كلاۋديو كاجادۋمەن كەزدەستى.
ا. راحمەتۋللين برازيليالىق دەپۋتاتتى قر-داعى ساياسي جانە الەۋمەتتىك-ەكونوميكالىق رەفورمالاردىڭ بارىسىمەن تانىستىردى، سونداي-اق جاھاندىق كۇن ءتارتىبى مەن حالىقارالىق الاڭدارداعى ءوزارا ءىس-قيمىل كونتەكستىندەگى ەلىمىزدىڭ سىرتقى ساياساتىنىڭ نەگىزگى باسىمدىقتارى تۋرالى ايتتى، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
سونداي-اق ول برازيليا قازاقستاننىڭ وڭتۇستىك امەريكا قۇرلىعىنداعى ماڭىزدى سەرىكتەسى بولىپ قالا بەرەتىنىن اتاپ ءوتىپ، پارلامەنتارالىق ديالوگ ەكى ەلدىڭ ساياسي ىنتىماقتاستىعىنىڭ نەگىزگى تەتىگى بولىپ تابىلاتىنىنا جانە قازاقستان مەن برازيليا اراسىنداعى قاتىناستاردىڭ بارلىق كەشەنىنە قۋاتتى سەرپىن بەرەتىنىنە سەنىم ءبىلدىردى.
ءوز كەزەگىندە ك. كاجادۋ قازاق ديپلوماتىن برازيلياداعى قازىرگى ساياسي، الەۋمەتتىك-ەكونوميكالىق جاعدايمەن جانە وڭتۇستىك امەريكا وڭىرىندەگى سوڭعى ۇردىستەرمەن تانىستىردى. سونىمەن قاتار فەدەرالدى دەپۋتات قازاقستاننىڭ حالىقارالىق ساحناداعى جەتىستىكتەرىن، ونىڭ ىشىندە ورتالىق ازيا وڭىرىندەگى شەشۋشى ءرولىن جوعارى باعالادى.
سونداي-اق كەلىسسوزدەر كۇن تارتىبىندە برازيليا قالاسىندا التىنشى ءسىمارالىق ساياسي كونسۋلتاسيالاردى تابىستى وتكىزۋ كونتەكستىندە ەكى ەل اراسىنداعى ساۋدا-ەكونوميكالىق ىنتىماقتاستىقتى ارتتىرۋ، سونداي-اق بيىلعى جىلى پورتۋ-الەگري قالاسىندا «قازاقستان-برازيليا» ىسكەرلىك كەڭەسىنىڭ III وتىرىسى ماسەلەلەرى تۇردى. سۇحبات بارىسىندا 2025 جىلى برازيليادا وتەتىن COP30 كليماتتىڭ وزگەرۋى جونىندەگى حالىقارالىق كونفەرەنسيا اياسىندا ەكى ەلدىڭ تىعىز ىنتىماقتاستىعى تۋرالى ۋاعدالاستىققا قول جەتكىزىلدى.
كەزدەسۋ بارىسىندا تاراپتار «قازاقستان-برازيليا» دوستىق توبىنىڭ الداعى ءبىرىنشى وتىرىسىنىڭ وزەكتى ماسەلەلەرىن تالقىلادى جانە ەكى ەلدىڭ زاڭ شىعارۋشى ورگاندارى اراسىنداعى بايلانىستاردى كەڭەيتۋ ارقىلى ساياسي ءوزارا ءىس-قيمىلدى دامىتۋعا ءوزارا قولداۋ كورسەتۋ تۋرالى ۋاعدالاستى.