14 جەلتوقساندا اۋىل شارۋاشىلىعى سالاسىنداعى ەكىجاقتى ىنتىماقتاستىقتىڭ پەرسپەكتيۆالىق باعىتتارىن ازىرلەۋ جونىندەگى قازاقستان-بەلارۋس بىرلەسكەن جۇمىس توبىنىڭ ءتورتىنشى وتىرىسى ءوتتى.
قازاقستان تاراپىنان تەڭ ءتوراعا رەتىندە اۋىل شارۋاشىلىعى ۆيسە-مينيسترى ءابىلقايىر تامابەك، بەلارۋس تاراپىنان اۋىل شارۋاشىلىعى جانە ازىق-تۇلىك ءمينيسترىنىڭ ورىنباسارى يۆان سميلگين ءسوز سويلەدى، دەپ حابارلايدى اlmaty-akshamy.kz.
ءابىلحايىر تامابەك ءوز سوزىندە اوك سالاسىنداعى ءوزارا ءىس-قيمىل ەكى ەل ىنتىماقتاستىعىنىڭ باسىم باعىتتارىنىڭ ءبىرى بولىپ تابىلاتىنىن اتاپ ءوتتى. 2023 جىلدىڭ 9 ايىندا اۋىل شارۋاشىلىعى ونىمدەرىنىڭ تاۋار اينالىمى 173،9 ملن دوللاردى قۇرادى، ءبىراق بەلارۋس تاۋارلارىنىڭ يمپورتى قازاقستاندىق تاۋارلاردىڭ ەكسپورتىنان الدەقايدا اسىپ ءتۇستى.
سوندىقتان قازاقستان تاراپى ءوز ونىمدەرىن بەلارۋس نارىعىنا ءتيىمدى جەتكىزۋدى جولعا قويۋعا، سورتتى سىناۋ جانە وسىمدىكتەردى قۇقىقتىق قورعاۋ سالاسىنداعى ىنتىماقتاستىققا، اگرارلىق عىلىم مەن ءبىلىم بەرۋ سالاسىنداعى بىرلەسكەن جۇمىسقا مۇددەلى.
تاراپتار مال شارۋاشىلىعى سالاسىندا، اتاپ ايتقاندا، ءسۇتتى مال شارۋاشىلىعى سالاسىنداعى ىنتىماقتاستىققا ەرەكشە نازار اۋداردى. ەكى ەلدىڭ وكىلدەرى قازاقستان رەسپۋبليكاسىنىڭ اۋماعىندا ءسۇت ونىمدەرىن ءوندىرۋ كەشەندەرىن سالۋ بويىنشا بىرلەسكەن جوبالاردى ىسكە اسىرۋعا دايىن ەكەندىكتەرىن جەتكىزدى.
سونداي-اق ءابىلقايىر تامابەك 2024 جىلعا جوسپارلانعان اۋىل شارۋاشىلىعى كورمەلەرىنىڭ ءتىزىمىن الماسۋدى ۇسىندى. يۆان سميلگين ءوز تاراپىنان قازاقستاندى بەلارۋس اگروونەركاسىپتىك اپتالىعىنا شاقىردى، اپتالىق اياسىندا «بەلاگرو-2024» حالىقارالىق اۋىل شارۋاشىلىعى جانە ازىق-تۇلىك كورمەسى وتەدى. سونىمەن قاتار، ەكى ەل اۋىل شارۋاشىلىعى سالاسىندا بىرلەسكەن عىلىمي-زەرتتەۋ جۇمىستارىن جۇرگىزۋ، سەلەكسيا جانە تۇقىم شارۋاشىلىعى سالاسىنداعى ىنتىماقتاستىقتىڭ مۇمكىندىكتەرىن قاراستىردى.
"بۇگىن ءبىز ناتيجەلى جانە مازمۇندى ديالوگ وتكىزدىك. جۇمىس توبىنىڭ كەزەكتى وتىرىسى ءبىزدىڭ سىزدەرمەن اوك سالاسىنداعى ءوزارا ءىس-قيمىلىمىزدىڭ تۇراقتى ءارى ناتيجەلى ەكەنىن ايقىنداپ بەردى. سىزدەرمەن ىنتىماقتاستىقتى ودان ءارى دامىتۋ ءۇشىن زور الەۋەت بار دەن سانايمىن"، - دەدى ءابىلقايىر تامابەك.
كەزدەسۋ سوڭىندا قازاقستان مەن بەلارۋس وكىلدەرى وتىرىس حاتتاماسىنا قول قويدى.