قاسىم-جومارت توقايەۆ شاقىرۋىن قابىل الىپ، استاناعا رەسمي ساپارمەن كەلگەنى ءۇشىن يلحام الييەۆكە العىس ايتتى، دەپ حابارلايدى اlmaty-akshamy.kz اقورداعا سىلتەمە جاساپ.
«بىلتىر تامىز ايىندا مەن باكۋگە ساپارمەن باردىم. بۇل ساپارىم اسا ناتيجەلى بولدى جانە ەكىجاقتى قاتىناستارعا تىڭ سەرپىن بەردى. ءقازىر پرەزيدەنتتەردىڭ ەكى ەل ۇكىمەتىنە بەرگەن تاپسىرمالارىنىڭ ورىندالۋ بارىسىن پىسىقتاۋ قاجەتتىلىگى تۋدى. ءازىربايجان مەن قازاقستان – باۋىرلاس ءارى دوستاس مەملەكەتتەر. ءبىزدىڭ تاراپىمىزدان ساۋدا-ەكونوميكا جانە ينۆەستيسيا سالالارىنداعى جان-جاقتى ىنتىماقتاستىقتى، سونداي-اق ەكىجاقتى فورماتتاعى جانە حالىقارالىق ۇيىمدار اياسىنداعى ساياسي قارىم-قاتىناستى دامىتۋ ءۇشىن بارلىق مۇمكىندىك جاسالىپ جاتىر. ءبىز كاۆكاز ايماعىندا جەتەكشى ءرول اتقاراتىن ءازىربايجان مەملەكەتىمەن ەكونوميكالىق قاتىناستار مەن ىنتىماقتاستىقتى دامىتۋ ءۇشىن اۋقىمدى جۇمىس جۇرگىزۋدى كوزدەپ وتىرمىز. ءبىزدىڭ ارامىزدا ەشقانداي ماسەلە جوق. تەك قانا وسى باعىتتا العا ىلگەرىلەۋگە دەگەن نيەت قانا بار»، – دەدى قاسىم-جومارت توقايەۆ.
مەملەكەت باسشىسى ءازىربايجان پرەزيدەنتىمەن بىرلەسىپ گەيدار الييەۆ اتىنداعى كوشەنى اشاتىنىن اتاپ ءوتتى.
"بۇگىن گەيدار الييەۆكە ارنالعان «عازيز عۇمىر» دەرەكتى ءفيلمىنىڭ تۇساۋكەسەرى وتەدى. ونى ءبىزدىڭ تاپسىرمامىز بويىنشا Qazaqstan تەلەراديوكورپوراسياسى ءتۇسىردى. ەلدەرىمىز اراسىنداعى باۋىرلاستىقتىڭ كورسەتكىشى قازاق حالقىنىڭ اتىنان فيزۋلي قالاسىندا سالىنىپ جاتقان بالالار شىعارماشىلىعىنا ارنالعان ورتالىق بولىپ وتىر. ماعان نىساننىڭ قۇرىلىسى قارقىندى سالىنىپ جاتقانىن ايتتى"، - دەدى توقايەۆ.
ءوز كەزەگىندە ءازىربايجان پرەزيدەنتى يلحام الييەۆ مەملەكەت باسشىسىنا العىسىن جەتكىزدى.
«قۇرمەتتى قاسىم-جومارت كەمەل ۇلى، ەڭ الدىمەن، ارنايى شاقىرعانىڭىزعا جانە قوناقجايلىعىڭىزعا العىس ايتامىن! گەيدار الييەۆكە كورسەتكەن قۇرمەتىڭىز ءۇشىن بۇكىل ءازىربايجان حالقىنىڭ جانە جەكە ءوز اتىمنان ريزاشىلىعىمدى بىلدىرگىم كەلەدى. جالپى، ءبىز بارشا قازاقستان حالقىنىڭ ەلىمىزگە دەگەن ىستىق ىقىلاسىن ءارقاشان سەزىنىپ كەلەمىز. ءازىربايجانعا رەسمي ساپارىڭىز بارىسىندا وسىنداي تىلەۋلەستىكتى ءسىز دە بايقادىڭىز دەپ ويلايمىن. ءبىزدىڭ رەسمي ساپارلار اياسىندا ءجيى كەزدەسۋىمىز وسى قارىم-قاتىناسىمىزدىڭ سيپاتىن اڭعارتادى جانە ۇدايى بايلانىستا بولۋ قاجەت ەكەنىن كورسەتەدى. ءوزىڭىز ايتقانداي، ءبىزدىڭ ەلدەرىمىزدىڭ بىر-بىرىنە دەگەن باۋىرلاستىق نيەتى شىنايى. بۇل – ەكىجاقتى ىنتىماقتاستىقتى دامىتۋعا جاقسى نەگىز. ىنتىماقتاستىق باعىتتارىنا كەلەتىن بولساق، ولاردى سانامالاۋعا ءبىراز ۋاقىت كەتەدى. ويتكەنى ول قوعامنىڭ بارلىق سالاسىن قامتيدى. ارينە، قازىرگى جاعدايدا ساۋدا-ەكونوميكالىق جانە ينۆەستيسيالىق جوبالار، سونداي-اق كولىك-لوگيستيكالىق ينفراقۇرىلىمعا قاتىستى جوبالار باسىمدىققا يە»، - دەدى ول.