وقۋ-اعارتۋ مينيسترلىگىنىڭ مالىمەتىنشە، 186 مىڭ تۇلەك مەكتەپ ءبىتىرىپ جاتىر.
بۇگىن، 25 مامىردا قازاقستان مەكتەپتەرىندە سوڭعى قوڭىراۋ سوعىلىپ جاتىر، دەپ حابارلايدى Almaty-akshamy.kz
ءقازىر مەكتەپتەردە "مەكتەبىم، ساعان مىڭ العىس" تاقىرىبىنداعى سالتاناتتى شارا ءوتىپ جاتىر.
ەسكە سالايىق، بۇعان دەيىن وقۋ-اعارتۋ ءبىرىنشى ۆيسە-مينيسترى سۆەتلانا جۇمادىلدايەۆا 2024 جىلعى 15 مامىردا وكق-دا وتكەن بريفينگ بارىسىندا مەكتەپتەردە سوڭعى قوڭىراۋ شاراسىن وتكىزۋ فورماتىنداعى وزگەرىسكە قاتىستى تۇسىنىك بەرگەن ەدى.
"وقۋ-اعارتۋ ءمينيسترى تۇلەكتەرگە وسى جىلى ءبىر اۋديتوريادا باس قوسا وتىرىپ، ءبىتىرۋ كەشىنىڭ جىلۋلىعى مەن ەستەلىكتەرىنە تولى سوڭعى قوڭىراۋدى وتكىزۋدىڭ جاڭا فورماتىن ايقىنداۋدى ۇسىناتىنىن حاباردار ەتتى. ءبىز ولارعا ونىڭ فورماتىن وزدەرىڭىز ويلاستىراسىزدار، بۇل كۆەست بولا ما، حاكاتون بولا ما نەمەسە اتا-انالارمەن بىرگە وتكىزىلەتىن كەش بولا ما، وزدەرىڭىز شەشەسىزدەر دەدىك. بۇل ارادا ماسەلە بارشا بالانى مەرەكەدەن ايىرۋ دەگەن بولعان جوق. مەكتەپتە جاڭا فورماتتى ۇسىنا وتىرىپ، ءبىز وسىعان دەيىنگى شىعىندى داستۇردەن باس تارتۋدى قاراستىرۋعا تىرىستىق. وزدەرىڭىز بىلەسىزدەر، بۇل كۇنى بارلىق كوشەدە كولىكتەر كورتەجى پايدا بولادى، اتا-انالار قاتتى شىعىندالادى، بارلىق اتا-انانىڭ قالتاسى مۇنداي شىعىندى كوتەرە دە بەرمەيدى، ءبىتىرۋ كەشتەرىن مەيرامحانالاردا وتكىزۋگە ۇمتىلادى، 25 مامىردا مەيرامحانالاردى جاپپاي جالدايدى. ءبىز وسىنىڭ الدىن العىمىز كەلدى"، - دەدى سۆەتلانا جۇمادىلدايەۆا.