QazVac-تان بولەك، تۇماۋ مەن تۋبەركۋلەزگە، وزگە دە ينفەكسيالىق اۋرۋلارعا قارسى ەكپەلەر بار.
بۇگىن جامبىلداعى «بيولوگيالىق قاۋىپسىزدىك پروبلەمالارى» عىلىمي-زەرتتەۋ ينستيتۋتىنىڭ جانىنان بيوفارماسيەۆتيكالىق زاۋىت اشىلدى، دەپ حابارلايدى Almaty-akshamy.kz
بۇدان بىلاي ەلىمىزدە جىل سايىن ينفەكسيالىق اۋرۋلارعا قارسى 60 ملن دوزا ۆاكسينا شىعارىلادى.
مەملەكەت باسشىسى قاسىم-جومارت توقايەۆ بۇگىن وتار ەلدى مەكەنىنە ارنايى كەلىپ، زاۋىتتى ارالاپ كوردى. مۇنداي جوبا ورتا ازيا اۋماعىندا العاش بوپ ءبىزدىڭ ەلدە جۇزەگە اسىپ وتىر. مەكەمەگە مىقتى مامانداردى تارتۋ ءۇشىن مەملەكەت بار جاعدايدى جاساۋدا. پرەزيدەنت تاپسىرماسىمەن قىزمەتكەرلەرگە ارنالعان 180 پاتەرلى ءۇي سالىندى. جانىندا سپورت-ساۋىقتىرۋ كەشەنى بار. عالىمداردىڭ جالاقىسى دا ەكى ەسەگە ارتتى.
«بارشاڭىزدى قۇتتىقتايمىن. شىن مانىندە ۇلكەن جەتىستىك. ەلىمىز ءۇشىن وتە قاجەتتى ءوندىرىس. جاڭا عانا قاراپ شىقتىم. نەگىزگى جۇمىس ورىندالدى. ءبارى دۇرىس. ەندى بۇل جۇمىس جالعاسىن تابادى. كەلەسى جىلى جالعاستىرامىز، ۆاكسينا وتە ءتيىمدى. گۋمانيتارلىق كومەك رەتىندە بۇل ۆاكسينانى اۋعانستانعا، باسقا دا مۇسىلمان ەلدەرىنە جىبەرەمىز. دۇنيە جۇزىندە مويىندالىپ جاتىر، بارشاڭىزدى قۇتتىقتايمىن. ريزاشىلىعىمدى بىلدىرەمىن»، - دەدى قاسىم-جومارت توقايەۆ.