قور ەسەبىنەن بولىنگەن 3،7 ملرد تەڭگەگە 4 بالاعا پرەپارات ساتىپ الىندى
"قازاقستان حالقىنا" قورىنىڭ ەسەبىنەن ومىرتقا بۇلشىق ەتىنىڭ اتروفياسىنا شالدىققان 4 بالاعا قازاقستان اۋماعىندا تىركەلمەگەن ZOLGENSMA پرەپاراتىن ساتىپ الۋ ءۇشىن جالپى سوماسى 3،7 ملرد تەڭگە تولەنگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
قوردىڭ رەسمي سايتىنىڭ حابارلاۋىنشا، «قازاقستان حالقىنا» قورىنىڭ قامقورشىلىق كەڭەسىنىڭ كەزەكتى وتىرىسىندا جۇمسالعان اقشانىڭ ەسەبى قارالعان.
25 ناۋرىزداعى جاعداي بويىنشا، قوردان قاڭتار وقيعاسىندا زارداپ شەككەندەرگە جالپى سوماسى 495 ميلليون تەڭگەگە قايىرىمدىلىق كومەك كورسەتىلگەن. ونىڭ ىشىندە:
- قازا تاپقان اسكەري قىزمەتكەرلەردىڭ، ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنىڭ وتباسىلارىنا – 133 ملن تەڭگە؛
- اۋىر جاراقات العان اسكەري قىزمەتكەرلەرگە، ىشكى ىستەر جانە ۇلتتىق قاۋىپسىزدىك ورگاندارىنىڭ قىزمەتكەرلەرىنە – 318 ملن تەڭگە؛
- قاڭتار وقيعاسىنىڭ كەزدەيسوق قۇربانى بولعان قازاقستان رەسپۋبليكاسى ازاماتتارىنىڭ وتباسىلارىنا – 35 ملن تەڭگە؛
- قاڭتار وقيعاسى كەزىندە زارداپ شەككەن بالالاردىڭ وتباسىلارىنا – 9 ملن.
«بۇل باعىتتاعى جۇمىستار ءالى دە جالعاسۋدا، ازاماتتاردىڭ ءولىمىنىڭ ءمان-جايىن قۇزىرلى ورگاندار انىقتاپ جاتىر»، - دەپ جازىلعان مالىمەتتە.
سونداي-اق، ومىرتقا بۇلشىق ەتىنىڭ اتروفياسىنا شالدىققان 4 بالاعا قازاقستان رەسپۋبليكاسىندا تىركەلمەگەن Onasemnogene Abeparvovec (ZOLGENSMA) پرەپاراتىن ساتىپ الۋ ءۇشىن جالپى سوماسى 3،7 ملرد تەڭگە تولەنگەن.
«ناۋقاستار اۋرۋحاناعا جاتقىزىلدى.ءار ناۋقاسقا دارىلىك زاتتى جەكە ءوندىرۋ ءۇشىن بيوماتەريالدار الىندى. ءبىرىنشى بالاعا پرەپارات 26 ناۋرىزدا ەنگىزىلدى، قالعاندارىن 8 ساۋىرگە دەيىن ەنگىزۋ جوسپارلانۋدا»، - دەپ جازىلعان قوردىڭ سايتىنداعى اقپاراتتا.