قايىرىمدىلىق - ادامنىڭ ءوز قالاۋىمەن جاسالادى
قورعا اۋدارىلعان قارجى اشىق جاريا ەتىلىپ، حالىق باقىلاپ وتىرا الادى. بۇل تۋرالى «قازاقستان حالقىنا» قورىنىڭ باسقارما ءتوراعاسى بولات جامىشيەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بولات جامىشيەۆ ورتالىق كوممۋنيكاسيالار قىزمەتىندە ونلاين وتكەن باسپا ءسوز ءماسليحاتىنا قاتىسىپ، قور قىزمەتىنە قاتىستى باستى جايتتاردى تارقاتىپ بەردى.
«قورعا تۇسكەن قاراجات كولەمىن تۇراقتى تۇردە حالىققا جاريا ەتىپ تۇرامىز. ونىڭ ىشىندە بيزنەس وكىلدەرىمەن قاتار ءىرى كومپانيالار دا بار. بۇعان دەيىن 2 رەت قورعا قانداي كولەمدە اقشا ءتۇسىپ جاتقانى تۋرالى اقپارات بەرگەن بولاتىنبىز. قايىرىمدىلىقتان بولەك، قورعا لوتەرەيا قىزمەتى وپەراتورلارىنان قاراجات تۇسەدى. سول سياقتى ۇكىمەتپەن انىقتالعان ۇتىس تىگۋ ورتالىقتارى مەن باسقا دا تابىس كوزىنەن قاراجات اۋدارىلادى. بۇل جۇمىستى ەندى قولعا الامىز»، - دەدى ب.جامىشيەۆ.
ءتوراعانىڭ ايتۋىنشا، جەكە تۇلعالار قور قىزمەتىنىڭ جاندانۋىنا ەرىكتى تۇردە قول ۇشىن سوزىپ جاتىر.
«ءبىز بىرەۋدى قيناپ، ەركىنەن تىس اقشا اۋدارۋعا ماجبۇرلەۋگە قارسىمىز. قايىرىمدىلىق - ادامنىڭ ءوز قالاۋىمەن جاسالاتىن شارا. مەملەكەتتىك ورگان قىزمەتكەرلەرىنىڭ قورعا اقشا جيناپ بەرۋىنە قاتىستى شاعىمدى ەستىپ جاتىرمىن. ارينە، ءبىز دە قارسىمىز. ەگەر ازامات ءوزى سولاي شەشىپ، جاقسىلىق جاساۋ نيەتىمەن اۋدارسا، وندا ءىس باسقا»، - دەيدى ول.