ەلىمىزدە اۋىلدىق جەرلەردە «100 سپورت زال» سالىنادى. اتالعان باستامانى «قازاقستان حالقىنا» قورى قولعا الىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىزدىڭ قور «100 سپورت زال» جوباسىن قولعا الدى. جوبانىڭ ەرەكشەلىگى سول، سپورت زالدار تەك اۋىلداردا سالىنادى. بيىل جوسپار بويىنشا 24 سپورت زال ىسكە قوسىلۋى ءتيىس»، - دەدى «قازاقستان حالقىنا» قوعامدىق قورىنىڭ باسقارما ءتوراعاسى بولات جامىشيەۆ ەلوردادا وتكەن باسپا ءسوز ءماسليحاتىندا.
ودان بولەك، قور باسشىسى اۋىل تۇرعىندارىنا ءبىلىم بەرۋگە قاتىستى تىڭ باستاما تۋرالى ايتتى.
«اۋىل - ءبىزدىڭ كومەك باعىتتالاتىن نەگىزگى اۋديتوريانىڭ ءبىرى. اۋىل تۇرعىندارىنا قاتىستى ءبىزدى تولعاندىراتىن تاعى ءبىر ماسەلە - ءبىلىم بەرۋ. وزدەرىڭىز بىلەتىندەي قازاقستان حالقىنىڭ جارتىسىنا جۋىعى اۋىلدىق جەرلەردە تۇرادى. وسى ورايدا ءبىز 17 ءوڭىر بويىنشا نازاربايەۆ زياتكەرلىك مەكتەبىنىڭ ءبىلىم بەرۋ جۇيەسى نەگىزىندە اۋىلداردا 17 مەكتەپ اشۋ يدەياسىن ۇسىندىق. ناتيجەسىندە تاياۋدا عانا اقمولا وبلىسىنىڭ قاتاركول اۋىلىندا العاشقى مەكتەپ اشىلدى»، - دەيدى ول.
بۇعان دەيىن بولات جامىشيەۆ قوستاناي وبلىسىندا بولعان ورمان ءورتى سالدارىنان زارداپ شەككەن جاندارعا قور اتىنان كومەك كورسەتىلەتىنى تۋرالى ايتقان ەدى.
ودان بولەك، «قازاقستان حالقىنا» قورىنان كومەك سۇرايتىن ەل ازاماتتارىنىڭ دەنى دەنساۋلىق جاعدايى بويىنشا جۇگىنەتىنى بەلگىلى بولدى.