ەلىمىزدە حالال ونىمدەر شىعاراتىن 4 200-دەن استام ءوندىرۋشى بار
قازاقستان حالال ونىمدەرىن سەرتيفيكاتتاۋدى جۇرگىزۋ قۇقىعى يە بولدى. مۇنداي رۇقسات بىرىككەن اراب امىرلىكتەرىنىڭ حالىقارالىق اككرەديتتەۋ ورتالىعىنان الىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر پرەمەر-مينيسترىنىڭ ورىنباسارى - ساۋدا جانە ينتەگراسيا ءمينيسترى باقىت سۇلتانوۆتىڭ ايتۋىنشا، بۇگىن بىرىككەن اراب امىرلىكتەرىنىڭ حالىقارالىق اككرەديتتەۋ ورتالىعى قازستاندارت زەرتحاناسىن اككرەديتتەۋ تۋرالى رەسمي قۇجات بەردى. قازستاندارت زەرتحاناسى، سونداي-اق حالال ونىمدەرىن سەرتيفيكاتتاۋ قۇقىعىنا يە بولدى.
«ەل ىشىندە حالال حالىقارالىق سەرتيفيكاتىن الۋ مۇمكىندىگى ەكسپورتتى ارتتىرۋعا ىنتالاندىرادى دەپ سەنەمىن. ەگەر ءقازىر كاسىپورىندار حالال سەرتيفيكاتىن الۋ ءۇشىن (يمپورتتاۋشى ەلدە) ءبىر پارتياعا 7 مىڭنان 30 مىڭ دوللارعا دەيىن جۇمساسا، قازاقستانداعى سەرتيفيكاتتاۋ قۇنى سەريالىق وندىرىسكە 700 مىڭ تەڭگەدەن (1،5 مىڭ دوللار) باستالادى. بۇل زەرتحانانىڭ سەرتيفيكاتتاۋ ناتيجەلەرى پارسى شىعاناعىنداعى بارلىق اراب مەملەكەتتەرىنىڭ (باحرەين، كاتار، كۋۆەيت، ءباا، ومان، ساۋد ارابياسى) اۋماعىندا مويىندالادى. سونىمەن قاتار ەكسپورت كولەمىن باسقا ايماقتارعا، ماسەلەن يران، تمد، تۇركيا جانە باسقا ەلدەرگە ۇلعايتا الامىز»، - دەپ جازدى باقىت سۇلتانوۆ Facebook-پاراقشاسىندا.
ۆيسە-پرەمەردىڭ دەرەگىنشە، قازاقستاندا تاماق ونىمدەرى، توقىما، فارماسيەۆتيكا، تۇرمىستىق حيميا جانە كوسمەتيكا سىندى حالال ونىمدەر شىعاراتىن 4 200-دەن استام ءوندىرۋشى بار.
«ايتپاقشى، زەرتحانامىز ەاەو پەن ورتالىق ازياداعى حالىقارالىق تالاپتار بويىنشا اككرەديتتەلگەن جالعىز زەرتحانا سانالادى. دەمەك ءبىز حالال بويىنشا وڭىرلىك حابقا اينالۋدامىز. ازيا، ەاەو جانە تمد ەلدەرىنىڭ كاسىپكەرلەرى ءوز ونىمدەرىنىڭ سايكەستىگىن باعالاۋ جانە پارسى شىعاناعى ەلدەرىنىڭ نارىعىنا شىعۋ ءۇشىن ءبىزدىڭ زەرتحانانى پايدالانا الادى»، - دەدى ب.سۇلتانوۆ.
بۇدان بولەك، ونىڭ مالىمەتىنشە، قازاقستاندا ەكسپورت كولەمىن ۇلعايتۋ بويىنشا جۇمىستار اتقارىلىپ جاتىر.
«2025 جىلعا قاراي شيكىزاتتىق ەمەس ەكسپورت كولەمىن 41 ملرد دوللارعا جەتكىزۋدى كوزدەيمىز. جىلدىڭ العاشقى ءۇش ايىندا ءبىرقاتار نەگىزگى ساۋدا سەرىكتەسىمىزبەن تاۋار اينالىمىن ەداۋىر ۇلعايتتىق. ەۋرووداق ەلدەرىمەن ءوزارا ساۋدا كولەمى وتكەن جىلدىڭ قاڭتار-ناۋرىزىمەن سالىستىرعاندا شامامەن 55،2 پايىزعا ءوستى. اقش-پەن - 35،6، قىتايمەن - 25،1 پايىز. ءوسىم شيكىزات جانە وڭدەلگەن تاۋارلاردا دا بايقالادى»، - دەدى ۇكىمەت باسشىسىنىڭ ورىنباسارى - ساۋدا جانە ينتەگراسيا ءمينيسترى.