كەلىسىلگەن بۇل مەجە ءساۋىر ايىندا ورىندالادى.
ەنەرگەتيكا مينيسترلىگى بەكىتكەن مۇناي تاسىمالى كەستەسىنە ساي «قازترانسويل» اق ءساۋىر ايىندا 100 مىڭ توننا قازاقستاندىق مۇنايدى «درۋجبا» مۇناي قۇبىرىمەن «اداموۆا زاستاۆا» مۇناي بەكەتى ارقىلى ءارى قاراي گەرمانياعا جونەلتۋدى جوسپارلاپ وتىر، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
وسى جىلدىڭ اقپان-ناۋرىز ايلارىندا «قازترانسويل» اق گەرمانياعا 40 مىڭ توننا مولشەرىندە قازاقستاندىق مۇنايدى تاسىمالدادى.
2022 جىلدىڭ جەلتوقسان ايىندا «قازترانسويل» اق 2023 جىلى 1،2 ملن توننا قازاقستاندىق مۇنايدى «ترانسنەفت» جاق ماگيسترالدى مۇناي قۇبىرىمەن «اداموۆا زاستاۆا» مۇناي بەكەتى ارقىلى گەرمانياعا جەتكىزۋگە ءوتىنىم بەرگەن بولاتىن.
مۇنايدىڭ بۇل ءترانزيتى قازاقستان مەن رەسەي ۇكىمەتى اراسىنداعى 2002 جىلعى 7 ماۋسىمداعى كەلىسىم شەڭبەرىندە جۇزەگە اسادى.