حالىقتىق شتاب مۇشەلەرى شىمكەنت قالاسىنداعى «تاسساي» يندۋستريالىق ايماعىنا بارىپ، كاسىپكەرلەرمەن جانە ەڭبەك ۇجىمدارىمەن كەزدەسۋ وتكىزدى.
بۇل ءىس-شارادا اتوم ەلەكتر ستانسياسى (اەس) سالۋ قازاقستاننىڭ ەكونوميكالىق جاعدايىنا قالاي اسەر ەتەتىنى تۋرالى كەڭىنەن ايتىلدى. شتاب مۇشەلەرى اەس سالىنعان جاعدايدا تۇراقتى جانە قولجەتىمدى ەلەكتر ەنەرگياسىن قامتاماسىز ەتۋ ارقىلى كاسىپورىندار مەن زاۋىتتار ءۇشىن ءوندىرىس شىعىندارىن ازايتۋعا مۇمكىندىك تۋاتىنىن ەرەكشە اتاپ ءوتتى.
اتاپ ايتقاندا، ۇزاق مەرزىمگە ارنالعان مۇنداي ەلەكتر ستانسياسى ەلەكتر ەنەرگياسىنىڭ تۇراقتى ءارى قولجەتىمدى تاريفتەرىن ۇسىنىپ، كاسىپورىنداردىڭ تيىمدىلىگىن ارتتىرادى. بۇل ءوز كەزەگىندە زاۋىتتار مەن فابريكالاردىڭ ءوندىرىس شىعىنىن ازايتىپ، ىشكى نارىقتا باسەكەگە قابىلەتتىلىگىن ارتتىرۋعا جانە ەكسپورتتى كەڭەيتۋگە جول اشادى. شتاب مۇشەلەرى اەس سالۋدىڭ ەل ەكونوميكاسى ءۇشىن وراسان زور سەرپىن اكەلەتىنىن، اسىرەسە، ونەركاسىپتىك سەكتوردا الدىڭعى قاتارلى ەلدەردىڭ قاتارىنا كىرۋ مۇمكىندىگىنە يە بولاتىنىمىزدى اتاپ ءوتتى.
سونىمەن قاتار، شتاب مۇشەلەرى كاسىپكەرلەرگە قازاقستاننىڭ 2060 جىلعا قاراي كومىرتەگى بەيتاراپتىعىنا قول جەتكىزۋ بويىنشا حالىقارالىق مىندەتتەمەنى قابىلداعانىن ەسكە سالدى. ياعني، كومىرمەن وندىرىلگەن ەلەكتر ەنەرگياسىن پايدالاناتىن تاۋارلارعا الەمدىك نارىقتا قوسىمشا سالىق سالىنادى، بۇل قازاقستاندىق تاۋارلاردىڭ باسەكەگە قابىلەتتىلىگىنە تەرىس اسەر ەتۋى مۇمكىن. قازىرگى ۋاقىتتا قازاقستان ەلەكتر ەنەرگياسىنىڭ 70%-ىن كومىر ەلەكتر ستانسيالارىنان الىپ وتىر، بۇل ەلدىڭ ۇزاق مەرزىمدى ەكونوميكالىق دامۋىندا ۇلكەن كەدەرگى تۋعىزۋى ىقتيمال. وسىعان وراي، اەس سالۋ ەلدەگى ەلەكتر ەنەرگياسى ءوندىرىسىن كومىردەن اتوم ەنەرگەتيكاسىنا اۋىستىرىپ، قازاقستاندىق ءونىمنىڭ حالىقارالىق دەڭگەيدەگى باسەكەگە قابىلەتتىلىگىن ارتتىرۋعا ستراتەگيالىق ماڭىزعا يە ەكەنىن اتاپ ءوتتى.
كەزدەسۋ سوڭىندا كاسىپكەرلەر مەن جۇمىسشىلار الداعى رەفەرەندۋمعا بەلسەندى قاتىسىپ، اەس-تى قولداۋعا دايىن ەكەندىكتەرىن ءبىلدىردى. ولاردىڭ ايتۋىنشا، اتوم ەنەرگەتيكاسىن دامىتۋ تەك ەنەرگەتيكالىق تاۋەلسىزدىكتى قامتاماسىز ەتىپ قانا قويمايدى، سونىمەن قاتار قازاقستاندا وزىق تەحنولوگيالاردى ەنگىزۋگە، شەتەلدىك ينۆەستيسيالاردى كوپتەپ تارتۋعا، ءوندىرىستى كەڭەيتۋگە جانە جاڭا جۇمىس ورىندارىن اشۋعا زور مۇمكىندىك بەرەدى.
كاسىپكەرلەر اتوم ەنەرگەتيكاسى قازاقستاننىڭ ەكونوميكاسىنىڭ جاڭا دەڭگەيگە كوتەرىلۋىنە، عىلىم مەن تەحنولوگيانى دامىتۋعا، سونداي-اق ونەركاسىپ سالاسىن جاڭعىرتۋعا قاجەتتى ماڭىزدى قادام ەكەنىنە سەنىمدىلىكتەرىن جەتكىزدى. وسىلايشا، اەس-تىڭ سالىنۋى ەلىمىزدىڭ ۇزاق مەرزىمدى ەنەرگەتيكالىق ستراتەگياسىنىڭ ءبىر بولىگى رەتىندە قابىلدانىپ، ونىڭ تۇراقتى دامۋ مەن باسەكەگە قابىلەتتىلىكتى ارتتىرۋداعى ءرولى ايرىقشا بولاتىنى تۋرالى ورتاق پىكىر ايتىلدى.