قازاقستان ەاەو ەلدەرىنە ەكسپورتتى ارتتىردى

يمپورت 21،1%-عا ءوسىپ، 2،6 ملرد اقش دوللارىن قۇرادى.

قازاقستان مەن ەاەو ەلدەرى اراسىنداعى تاۋار اينالىمى 2022 جىلعى قاڭتار-اقپاندا وتكەن جىلدىڭ ۇقساس دەڭگەيىنە قاراعاندا 22،8%-عا ءوسىپ، 3،8 ملرد اقش دولل. قۇرادى، دەپ حابارلايدى Almaty-akshamy.kz.

بۇل رەتتە قازاقستاننىڭ ەكسپورتى 26،8%-عا ارتىپ، 1،2 ملرد. اقش دوللارىن قۇرادى.

«شەتەلگە ىستىقتاي يلەكتەلگەن بولاتتان جاسالعان جازىق يلەك، اليۋمينيي وكسيدتەرى مەن گيدروكسيدتەرى، وڭدەلمەگەن مىرىش، جالاتىلعان بولاتتان جاسالعان جازىق يلەك، باعالى مەتالداردىڭ كەندەرى مەن كونسەنتراتتارى، فەرروقورىتپالار سياقتى تاۋارلاردى جەتكىزۋ ۇلعايدى»، - دەلىنگەن ساۋدا جانە ينتەگراسيا مينيسترلىگىنىڭ باسپا ءسوز قىزمەتىنىڭ حابارلاماسىندا.

2022 جىلعى قاڭتار-اقپاندا ەاەو ەلدەرىنەن قازاقستانعا يمپورت 21،1%-عا ءوسىپ، 2،6 ملرد اقش دولل. قۇرادى.

ەاەو ەلدەرىنەن يمپورتتىڭ ءوسۋى بيداي، مۇناي ونىمدەرى، قوسپالانعان بولاتتان جاسالعان جارتىلاي فابريكاتتار، كۇنباعىس تۇقىمدارى، ينسەكتيسيدتەر، گەربيسيدتەر، ەتيلەن پوليمەرلەرى سياقتى تاۋارلاردى اكەلۋدىڭ ۇلعايۋىمەن نەگىزدەلەدى.