ەكى جىل ىشىندە ءوز كورسەتكىشتەرىمىزدى جوسپارلى تۇردە جاقسارتا الدىق
قازاقستان بۇۇ رەيتينگىندە ەلەكتروندىق ۇكىمەتتى دامىتۋ بويىنشا 28-ورىندى يەلەندى. بۇل تۋرالى بۇگىن ءوزىنىڭ Instagram پاراقشاسىندا ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين جازدى، دەپ حابارلايدى Almaty-akshamy.kz.
«دوستار! سىزدەرمەن جاقسى جاڭالىقتى جەتكىزگىم كەلىپ وتىر! قازاقستان بۇۇ (UN Global E-Government Development Index) رەيتينگىندە «ەلەكتروندىق ۇكىمەتتى» دامىتۋ بويىنشا 28-ورىندى يەلەندى. وسىلايشا، 29-شى قاتاردان ءبىر ورىنعا جوعارى كوتەرىلدىك.
رەيتينگتى شىعارۋ بارىسىندا بۇۇ ساراپشىلارى ەلەكتروندىق قىزمەتتەر مەن ادامي كاپيتالدىڭ دامۋىن، سونداي-اق تەلەكوممۋنيكاسيالىق ينفراقۇرىلىمدى باعالايتىنىن ەسكە سالا كەتەيىن. بۇل رەيتينگ سوڭعى رەت 2020 جىلى جاريالانعان بولاتىن. ءبىز كوروناۆيرۋس پاندەمياسىنا جانە باسقا دا قيىندىقتارعا قاراماستان، ەكى جىل ىشىندە ءوز كورسەتكىشتەرىمىزدى جوسپارلى تۇردە جاقسارتا الدىق.
سيفرلىق ۇكىمەتتى دامىتۋ مەملەكەت باسشىسىنىڭ ەرەكشە باقىلاۋىندا، قاسىم-جومارت كەمەل ۇلى سيفرلىق ترانسفورماسيا ەلدىڭ باسەكەگە قابىلەتتىلىگىن ايقىندايتىنىن اتاپ ءوتتى. ءبىز وسىمەن توقتاپ قالماي، وتاندىق اقپاراتتىق-كوممۋنيكاسيالىق تەحنولوگيالاردىڭ ساپاسىن ارتتىرۋ باعىتىندا ءتيىستى جۇمىستى جالعاستىراتىن بولامىز. بولاشاقتا كوشباسشىلاردىڭ قاتارىنان كورىنىپ، بۇۇ رەيتينگىندە 20-شى ورىندى يەلەنۋگە تىرىسامىز!» - دەلىنگەن حابارلامادا.