وزبەكتىڭ جەتى بىردەي بوكسشىسى وليمپيادانىڭ شيرەك فينالىنا شىقتى. دەمەك وزبەكستان قۇراماسىندا كەمى جەتى قولا مەدال بار دەگەن ءسوز.
ال، ءبىزدىڭ بوكسشىلاردان تەك نۇربەك ورالباي عانا 1/4 فينالعا ءوتتى. بۇل وتە ۇيات جاعداي. قازاقستان بوكس دەرجاۆاسى دەگەن داڭعازانى قويۋ كەرەك. كىنانى تورەشىلەر مەن ۇيىمداستىرۋشىلاردان ىزدەۋ دە ۇيات.
شىن مىقتىلار شارشى الاڭدا ويناقتاپ ءجۇرىپ جەڭسە، ەشكىم جەڭىسىن جۇلىپ الماس ەدى. وزبەكتەردى سۋديالار سۇيرەپ شىعاردى دەپ ايتا المايمىز. قاي-قايسىسى بولسا دا جانىپ تۇر. رينگتە جانىن بەرىپ، سوڭعى سەكۋندتقا دەيىن شايقاسۋدا. ال، ءبىزدىڭ جىگىتتەردەن مۇنداي جانكەشتىلىك بايقامادىم.
بۇعان ارينە جاتتىقتىرۋشىلار مەن باس باپكەر كىنالى. ەگەر سپورتشىدا نامىس، مىنەز، ۇلتتىق رۋح بولماسا ءبارى بەكەر. جەتەكتەگەن تازى اڭ المايدى. بوكسشىلاردى تەك اقشامەن عانا قىزىقتىرۋ ازدىق ەتەدى. كوزىندە وت، كەۋدەسىندە شوق بار جىگىتتەردى قۇراماعا شاقىرۋ كەرەك ەدى.
ايتپەسە بوكسشىلاردىڭ الاڭسىز جاتتىعۋ جاساۋىنا مەملەكەت بار جاعدايدى جاسادى. الايدا ناتيجە ءنول. توكيو وليمپياداسىنداعى قاتەلىكتەردەن ساباق الماعانىمىز كورىنىپ تۇر. سوندىقتان سپورت سالاسىنا رەفورما كەرەك.
ءار فەدەراسيانىڭ قۇلاعىن ۇستاپ وتىرعان وليگارحتار مەن شەن-شەكپەندىلەردى تۇگەل جۇمىستان بوساتۋ كەرەك. ورنىنا سپورتتى بىلەتىن، تۇسىنەتىن كاسىبي مامانداردى قويۋ كەرەك. تەك سول كەزدە عانا ناتيجە بولادى.
ايتپەسە بار ءومىرىن سپورتقا سارپ ەتكەن تالاي ساڭلاق ەكى قولعا ءبىر كۇرەك تاپپاي ساندالىپ ءجۇر. كەزىندە كوك بايراعىمىزدى جەلبىرەتىپ، ءانۇراندى اسقاقتاتقان ازاماتتار ءقازىر قايراڭدا قالعان كەمەدەي جاعاعا شىعىپ قالدى. سولارعا جاقسى ايلىق تولەپ، چەمپيوندارىمىزدى جاستاردى تاربيەلەۋگە تارتۋ كەرەك. تەك سوندا عانا ناتيجە بولادى.
ايتپەسە شەتەلدەن شاقىرعان باپكەرلەر مەن لەگيونەرلەرگە قازاقتىڭ تەك اقشاسى كەرەك. كەلىسىم-شارتى اياقتالعان كۇنى ولار الدى-ارتىنا قاراماي تايىپ تۇرادى. ارتىندا سۇراۋى جوق. سوندىقتان قازاق سپورتىن دامىتۋعا تەك قازاقتار عانا مۇددەلى.