قازاقستان بەيبىت جانە تەڭگەرىمدى سىرتقى ساياساتتى قاتاڭ ۇستانىپ كەلەدى. بۇل تۋرالى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ جاتقان مەملەكەت باسشىسى قاسىم-جومارت توقايەۆ ايتتى.
«قازاقستان بەيبىت جانە تەڭگەرىمدى سىرتقى ساياساتتى قاتاڭ ۇستانىپ كەلەدى. ەلىمىزدىڭ ەگەمەندىگى مەن تاۋەلسىزدىگىن نىعايتۋ، شەتەلدەگى ازاماتتارىمىزدىڭ قۇقىقتارىن قورعاۋ، ۇلتتىق مۇددەلەرىمىزدى ىلگەرىلەتۋ، ەكونوميكاعا ينۆەستيسيا تارتۋ – ديپلوماتتارىمىزدىڭ باستى مىندەتى. قازاقستان بىرىككەن ۇلتتار ۇيىمىنىڭ جارعىسىن قاتاڭ ۇستانا وتىرىپ، كوپ جاقتى ىنتىماقتاستىق ورناتۋعا قاشاندا دايىن ەكەنىن پاش ەتىپ كەلەدى. ەلىمىز حالىقارالىق قاۋىپسىزدىك جانە تۇراقتىلىق ماسەلەلەرىن شەشۋگە بەلسەندى اتسالىسادى»، - دەدى مەملەكەت باسشىسى.
قاسىم-جومارت توقايەۆ قازاقستان بىرىككەن ۇلتتار ۇيىمى مەن باسقا دا حالىقارالىق ۇيىمداردىڭ تەرروريزمگە، ەكسترەميزمگە، زاڭسىز كوشى-قونعا، كليماتتىڭ وزگەرۋىنە جانە وزگە دە قاۋىپ-قاتەرلەرگە قارسى كۇرەسۋ جولىنداعى تالپىنىستارىن قۇپتايتىندىعىن ايتتى.
«سونداي-اق بىرىككەن ۇلتتار ۇيىمىنىڭ بىتىمگەرلىك قىزمەتىن، قارۋسىزدانۋعا قاتىستى باستامالارىن بارىنشا قولدايمىز، قارۋلى قاقتىعىستاردى ديپلوماتيالىق جولمەن شەشۋ قاجەت دەپ سانايمىز. استانادا قازاقستانىڭ توراعالىعىمەن ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە، تاۋەلسىز مەملەكەتتەر دوستاستىعىنا، شانحاي ىنتىماقتاستىق ۇيىمىنا، تۇركى مەملەكەتتەرى ۇيىمىنا مۇشە ەلدەر باسشىلارىنىڭ سامميتتەرى سياقتى ءبىرقاتار ماڭىزدى حالىقارالىق ءىس-شارا ءوتتى. بىزگە قولداۋ كورسەتكەنى ءۇشىن وداقتاستارىمىز بەن سەرىكتەستەرىمىزگە شىنايى ريزاشىلىعىمىزدى بىلدىرەمىز»، - دەدى پرەزيدەنت.